自問是蝦癡，鍾意食蝦多於食蟹，貪其拆殼Easy肉質Juicy。當人人以為近期大閘蟹最強，其實花竹蝦都特別肥美肉厚，用來炒蝦碌最正！不過海鮮價日日唔同，幾時入貨先算抵買？有海鮮檔檔主就教我最好吼風平浪靜的日子買蝦，因為每當颳大風，就會少了船家出海撈獲，蝦價自然貴啦！
記者：趙珮倩
攝影：王文忠
示範：連鎖飲食集團總廚陳鋼
場地：六福菜館（西貢市場街49號27929966）
Sam（六福菜館老闆）
入行10多年，兩年前開六福菜館，提供家常小菜，招牌菜有椒鹽豆腐。
大鬼蝦夠大隻
「蝦，係香港人至愛的海鮮之一，呢期有大鬼蝦當造，係合時先食到咁大隻，而且𠵱家係蝦季，蝦價平均較平，過完年會貴番啲。」
陳鋼（連鎖飲食集團總廚）
入行30年，曾任酒店及著名海鮮酒樓大廚，現負責連鎖飲食集團之管理、品質監督及菜式設計。
大隻蝦要走油
「天氣凍啲蝦都大隻肥美啲，揀蝦最緊要揀生猛，掂吓蝦腳即郁即新鮮。記得越大隻蝦纖維越粗，要走油再炒啲肉先爽，唔好成隻攞去蒸。」
鍾太（海鮮檔檔主）
「基圍蝦最多人買，因為價錢平，經濟抵食嘛！」
蕭小姐（主婦）
「最近啲花竹蝦好大隻，百幾蚊一斤都算合理，我鍾意豉油王炒，易煮又好食。」
花竹蝦
外形：硬殼，蝦身紋理清晰，蝦尾多呈鮮黃與彩藍色，十分搶眼。
產地：多產於南沙群島一帶深海，8至11月份特別肥美。
肉質：爽甜肉嫩，咬落比鬼蝦更爽，蝦頭多膏又多汁。
點煮：走油後，加入茄汁或豉油炒蝦碌；又可以鹹蛋黃炒、上湯焗皆可。
Price
特大Size$192/斤 （a）
大Size$162/斤 （b）
中Size$96/斤 （c）
中Size$128/斤 （d）
中Size$138/斤 （e）
大鬼蝦
外形：硬殼，顏色深沉，呈褐黑與深紅相間。
產地：香港及泰國，盛產於11月。
肉質：蝦肉纖維粗，肉質較花竹蝦腍。
點煮：走油後加茄汁或豉油炒蝦碌，或以芝士焗皆可。
Price
$192/斤（a）
海中蝦
外形：硬殼，顏色啞身帶紅。
產地：香港、東南亞及南中國海一帶，四季可嚐。
肉質：爽甜纖維幼，味鮮香。
點煮：宜開邊蒜茸蒸或烤焗。
Price
$96/斤（a）$68/斤（c）$78（d）
麻蝦
外形：軟殼，色澤白淨透紅。
產地：香港、馬來西亞及台灣，四季可嚐。
肉質：爽甜肉嫩、鮮香味美。
點煮：適宜白灼。
Price
$56/斤（a）64/斤（b）
基圍蝦
外形：軟殼透身，色澤黝黑。
產地：香港及珠江三角洲水域一帶，多數是養蝦，四季可嚐。
肉質：肉腍唔爽，甜味一般。
點煮：適宜白灼。
Price
$48/斤（b）$48/斤（e）
查詢
（a）西貢權利魚枱27929862
（b）西貢中興利海鮮27921892
（c）九龍城新榮海鮮64130683
（d）百佳27404159
（e）惠康22446501
豉油王花竹蝦
0hr25min
製作難度：★★☆☆☆
花竹蝦經走油，炸到殼脆肉爽，如懶得走油改為煎熟，蝦殼會較為腍身不夠香口。
材料
花竹蝦1/2斤、蒜茸/亁葱各1/2茶匙、生抽/紹酒各1湯匙、老抽/糖/雞粉各1/2茶匙
做法
1.將花竹蝦修剪頭和鬚腳，一開二切成蝦碌。
2.燒猛油，下花竹蝦走油，瀝亁油備用。
3.燒熱鑊，爆香亁葱、蒜茸，加入生抽、老抽、糖、雞粉煮勻，花竹蝦回鑊，快兜灒酒，炒勻上碟。
貼士
紹酒要最後落，否則香氣會一早揮發。
蒜茸開邊蒸中蝦
0hr15min
製作難度：★★☆☆☆
喜歡吃粉絲的話可先將粉絲鋪底一同與中蝦蒸熟，這樣更吸收蝦汁精華。
材料
海中蝦1/2斤、蒜茸4湯匙、葱花/蒸魚豉油各少許
做法
1.海中蝦挑腸洗淨，開邊，排放碟上。
2.蒜茸鋪上海中蝦，隔水蒸5分鐘。
3.倒去水份，淋蒸魚豉油及撒葱花。
貼士
蒸好的蝦要倒去多餘水份才淋上豉油，否則會冲淡豉油味。
白灼基圍蝦
0hr05min
製作難度：★☆☆☆☆
基圍蝦肉質雖然較腍，但選買新鮮白灼的話可食到蝦的鮮味。
材料
基圍蝦1/2斤、鹽1茶匙
做法
1.基圍蝦洗淨。
2.開大火燒滾水，下鹽，放入蝦灼4分鐘撈起即可。
貼士
白灼蝦一定要水滾落，灼至轉色及攣身即要撈起，灼過熟蝦肉會變嚡！