梁洛施（Isabella）同英皇娛樂解約，佢同英皇冇任何關係後，聽聞好多公司對佢復出拍戲好感興趣，但Isabella希望進修完，搵到新經理人後先接戲。
噚日有消息，指張藝謀有一部電影想搵佢演出，馮仁昭了解過呢件事，部戲原來係美亞公司投資，戲名叫《杜蘭朵》，幾年前張藝謀就喺內地搞過呢個歌劇，上年美亞買咗電影版權，諗住搵程小東同張藝謀開拍，女主角就想搵Isabella做。
希望明年合作
馮仁昭向美亞老闆李國興求證，佢話：「公司係搞緊呢部戲，聽佢哋講係想搵梁洛施做，但詳情我都唔清楚，因為製作嘅嘢，我一向唔理。」美亞製作部負責人禤嘉珍就話：「梁洛施係一個好有潛質嘅演員，好早已經想同佢合作，但因為佢嘅官司未解決，所以合作唔到，𠵱家解決晒合約官司，出年係希望可以同佢合作拍部戲。」