破產兩個月嘅雷曼兄弟又有新搞作,繼全球業務分豬肉拆售後,噚日計劃將公司手頭上嘅藝術品,拎出嚟拍賣還錢。據路透社講,佢哋喺禮拜一已經入稟紐約法庭,希望當局優先支付批藝術品嘅倉租同鑲架費,方便買家睇貨,將藝術品盡快脫手還債。
雷曼話晒係過百年歷史老店,手頭上當然收埋唔少值錢嘅藝術品,聽講呢批藝術品估值達800萬美金,即係大約6240萬港銀。家吓批藝術品集中收藏喺紐約同巴黎嘅倉庫,部份就仲擺喺各地辦事處。
賣完地又賣飛機
其實,雷曼呢幾個禮拜都陸續賣資產,包括以625萬美金(約4875萬港銀),出售花旗國新澤西州一幅未發展嘅50英畝地皮。上個禮拜又獲法庭批准,作價2490萬美金(約1.94億港銀)出售一架私人飛機。唔知大清貨幾時先至完呢?