美聯集團（1200）主席黃建業近排認真唔得閒，既要面對神秘人梁向榮狙擊，又要不斷諗計為公司慳皮。集團旗下子公司香港置業，喺美國銀行中心33樓嘅總部亦都準備唔要，喺12月31日租約到期之後唔再續租，全部人手搬返去環球大廈25樓嘅美聯總部。
每月料執19萬
港置𠵱家用緊嘅美銀單位，其實係由美聯持有，美聯已經拎番出嚟放租，單位面積3778方呎，呎租叫緊50蚊。如果以呢個價租出，月租都近19萬銀，租金雖然同高峯期每呎83蚊完全冇得揮，但總算係以市場正常價錢放盤，可以幫補一吓，喺呢個時勢，小數怕長計，搵得幾多得幾多。
冇幾耐前，美聯啱啱以提高生產力為由，決定將港置公關及廣告部、資料研究部等後勤同美聯合併，即刻炒咗職位重叠嘅20幾人；冇俾人炒嘅員工，已經收拾晒細軟，全部返阿媽嘅環球總部繼續做嘢。
另外，同系嘅美聯工商舖（459）自從8月轉咗去主板上市後，咁唔好彩就要面對行業收縮嘅困局。
高層做騷有苦衷
為咗避免一上主板業績就要見紅，行政總裁黃子華話呢排個個都辛苦咗，同時已經實行優化計劃去提高競爭力，包括cut廣告同重整人手，但未行到炒人呢一步，等人手自然流失。
不過，佢就話呢輪最重要都係定期出嚟現吓身，證明自己仲喺度，因為呢排啲網上傳聞威力好勁，唔見人一兩日，就好易俾人傳已經起咗身冇得撈。
李華華
mailto:[email protected]