香港地，家長們成日話無乜時間同小朋友做運動，讀書先最緊要。偏偏有個家庭，仔女未夠十歲就開始參加三項鐵人賽，平日唔止出街練踩，返屋企都有專用器材KeepOn踩踩踩，甚至踩出香港參賽，如此狂熱的原因就是爸爸Kenny堅信「運動能醫百病」。
記者：林佩婷
攝影：王文忠
鐵人大廳 一屋器材
踏入Kenny家，一屋擺滿三人的獎盃，大廳都給跑步機及單車器材佔去了，就知這個鐵人家庭非浪得虛名。
04年開始，Kenny跟囝囝囡囡Bianca及Joshua不斷參加三項鐵人賽，獲獎無數，足迹遠至內地、新加坡及馬來西亞等等。鐵人爸爸卻不為攞獎，「我本身好鍾意運動，口頭禪就係『運動能醫百病』，所指唔單止強身健體，連成個人嘅性格、懶散情況都可以改善。」
四日游水三日跑步兩日踩單車
由於堅信運動的好處，所以子女從細就跑步、游水、踏單車。有日Kenny忽發奇想去參賽。「我嗰陣諗，橫掂平時都玩開呢三樣活動，不如去參加三項鐵人，於是就同當時十歲嘅Bianca參加『V蛙水陸鐵人賽』，雖然抱住玩玩吓嘅心態，點知第一次就攞獎，有獎自然有動力。第二年仲同埋八歲囝囝一齊玩，囡囡就得第二名。」
之後一年，他們越玩越認真，一星期游四日水（每次兩小時）、跑三日步（每次30分鐘）、踩兩日單車（每次個半小時）。後來更加入力行三項鐵人會，有教練指導之餘，每年亦會有集訓及比賽。幾年間，參賽無數，最難忘是Joshua第一次玩就迷路：「原本我跑緊第一，點知個指導員教錯條路，到二十秒後先知，後來只得第二。」
由怕見人到唔怕炒車
小鐵人運動量大，身體自然好，Kenny話他們即使病了，只要吃一劑藥再慢跑半小時必定痊癒。除此，連Kenny跟太太兩人的性格都有很大轉變。「囡囡以前較依賴怕事，細個出街見到長輩會驚到喊，𠵱家從運動強化自信，夠膽面對群眾、更吃得苦。至於細佬Joshua以前好驚青，去鬼屋嘈到嚇死人。𠵱家就算炒車瞓晒地都唔怕，只怕撞壞架車。最大改變就係以前一日到黑打機玩電腦，我哋要鎖住唔畀佢玩，家陣變得有自制能力。兩個最大進步就係集中力好咗，讀書成績突飛猛進，令人安慰。」目標希望仔女將來能代表香港出賽。
多樣化三項鐵人賽
其實三項鐵人不但只有成人參賽，還會分不同組別。好像今個星期六、日的OSIM2008香港ITU三項鐵人亞洲盃就有精英組奧運距離以至小鐵人組等不同組別，讓不同年齡、身份的人士都能參與。而小鐵人組就給8歲以上的學童。
網址： http://www.triathlonhk.com
查詢：25048282
