靚酒如美人　Audrey身價50萬

減酒稅，我等普通酒民，可能開派對飲到平一點的紅酒，食飯飲多兩支特價啤酒，但原來，紅酒市場因而慢慢在香港變天，減酒稅之後，紅酒在香港交投更趨活躍，最近更有收藏家搞私人鑑賞會，拿出百年珍藏展示，因為有價有市，喜歡的話，價合即成，最貴一支百年佳釀，估計要50萬。

記者：張一豪
攝影：陳陶鈞

價值來自欣賞

一支酒，原本用來飲，被人賣來賣去，身價越炒越高，令人越來越不捨得飲，擺過百年，身價又上一層，每啖都值萬金，更不會飲，最後這些紅酒本身應有的角色已蕩然無存，酒再不是酒，但陶傑卻將紅酒比喻為女人，更為這些「天價美人」辯護：「酒同女人一樣，最靚嘅酒，就好似柯德莉夏萍級數嘅靚女，唔係人人有機會接觸得到，而識欣賞嘅人，行埋佢身邊睇吓，感受一下佢嘅氣質，已經好興奮、好滿足，你亦唔敢同佢有再進一步接觸，只可遠觀而不可褻玩，係女神。」
「紅酒都係一樣，一啲罕有，又有歷史價值嘅美酒，已經昇華到超越本身『飲』嘅意義，呢啲酒通常飲一支少一支，佢背後會有好多故事，包括酒莊、年份，同歷史時空嘅關係，例如呢支1865嘅Lafite，佢本身已經係一支靚酒，釀造嘅技術，已經係藝術，加上時間冲刷、發黃招紙、磨損過嘅酒樽、微脹嘅酒塞，只要你得閒拎出嚟欣賞吓，聞聞酒塞下嘅陳年香味，再諗吓佢經歷百年風霜，意義已經唔再只係飲。當然，佢本質都係酒，你可以飲咗佢，變成你值得回味嘅經驗，但因為佢稀有，你就要付出不菲代價。如果你只係想追求一刻興奮，其實仲有好多又平又靚嘅選擇，就好似東莞、深圳有唔少靚女，平平哋都有交易，但興奮過後，你就會唔記得佢。」醇酒跟美人，這個比喻入時又到肉，應該好多升斗市民都明白。

■最靚的酒，是柯德莉夏萍級女神，可遠觀而不可褻玩。

靚酒價值企硬

黃力（PhilipWong），因為做生意要去應酬，20年前邂逅紅酒，飲得多，成為專家，再成為收藏家，珍藏不少法國國寶級、已禁售出國的百年佳釀，最老一支是1865的Lafite，他星期六會開鑑賞會，拿出珍藏展覽，價合更會賣出，以酒會友。
「紅酒真係越飲越有癮，尤其幾家一級酒莊，唔同年份因為收成唔同，飲出嚟有唔同嘅性格。最重要係產量唔多，無論在品嚐角度、收藏角度，都令人着迷。」他弟弟在美國開酒舖，穿州過省幫他收酒。原來美國人有錢時，收購了不少好酒，如今金融海嘯，正是入貨好時機，「近兩年好多公司高層都放靚酒套現，支1865Lafite都係我趁一家酒舖執笠時買下。」他睇好香港紅酒市場，因為好多人玩酒，都用閒錢玩，而且酒稅減，已有不少人將珍藏運回香港，加上好酒是賣一支少一支，十分珍貴，價錢一定有升無減，所以是很好的投資。

紅酒中心有商機

與Philip一起搞環保生意的Mathew：「因為我同Philip合作開，喺佢嘅感染之下，我呢3年都開始學飲酒同玩酒。撇開品嚐嘅角度，在商言商，紅酒都好有投資價值。尤其法國一級嘅5大酒莊，為控制質素，唔會濫造，所以數量一定有限，飲一支就少一支，唔同黃金、鑽石咁可以繼續開採，一定保值。香港如果發展成為紅酒中心，除咗激活交投，令酒商同投資獲利之外，搞好紅酒中心嘅配套，例如紅酒保險，國際認可嘅儲存酒窖，就會引伸出各種投資，都可以製造好多就業機會。」原來紅酒中心本身都充滿機遇，近來香港紅酒交易漸趨活躍，與其搞「經濟機遇委員會」這些小動作，不如踏實搞好紅酒中心的角色，唔好搞到中藥港、科技園一樣，可能這才是香港對抗金融海嘯的其中一個出路。