警隊前一哥李明逵打得又煮得，舊年退休後變身廚神，教人煮好餸。噚日佢為港台節目《開心日報》做錄音，就大爆警隊多年嚟嘅飲食秘聞。
李sir後生當差嗰陣（應該係30幾年前嘅事），警察原來最鍾意食糯米雞。李sir話當年佢哋清晨出更，會將一隻熱辣辣嘅糯米雞放喺制服裏面，等到休息嗰陣拎出嚟慢慢嘆。
八方一位極資深嘅同事，對呢個講法有少少補充，佢話當年警察喺街食嘢極受尊重，鍾意就喺大牌檔坐低，要左髀有左髀，食乜都得喎，邊使咁狼狽？
呢啲畢竟都喺好多好多年前嘅事，況且食糯米雞易肥，𠵱家嘅警察飲食文化健康好多。
退休一年瘦12磅
李sir話現今嘅警務人員，原來好鍾意食生果，特別鍾意咬蘋果、食香蕉。李sir話自己退休之後，少咗應酬，加上自己煮食講究健康，一年內足足瘦咗12磅。
一哥退休後醉心廚藝，喺佢個一哥廚房內，最少有七、八條圍裙，睇怕仲多過佢當差嗰時啲制服。如果想知多啲李sir嘅入廚秘笈，可以喺聽朝10點半至12點，收聽港台一台。