立法會噚日用咗接近九個鐘表決通過出動尚方寶劍、權力及特權條例調查雷曼迷債事件，泛民同好多議員早就表明態度，惟獨係民建聯嘅立場一直曖曖昧昧。民記喺功能組別手握三票，係通過議案嘅關鍵，連日嚟有大批雷曼苦主去佢哋黨總部喊寃，民記無路可退，到投票前夕先至決定支持用特權法。
民記下令禁借尿遁
民建聯噚日嚴陣以待，防止有人唔聽指示，開會前嘅黨團會更加落咗指令，要求各議員喺投票期間，唔好四圍走唔見咗影，主席譚耀宗仲話，黨員如非必要，連廁所都唔好去。咁肉緊箍票嘅態度，同政府懶懶閒棄守唔做嘢完全相反。
噚日會議發言議員特別踴躍，八方見到民記議員真係好聽黨話，個個都黐喺個位盡量唔行開，好可能已經出動秘密武器，每人都帶備尿壺入場，急起上嚟可以就地解決，確保投票時萬無一失，唔會有人借尿遁。
民建聯尋日全程都派出唔少人助陣，不過身為行會成員嘅劉江華就例外冇現身，佢雖然係直選票王，但好明顯入咗行會後要同政府保持一致，唔去立會投票雖然可以避免角色衝突。據聞黨團決定派出三位議員發言，但最終只有李慧琼同陳鑑林開腔。
八方見到身兼鄉議局副主席嘅張學明一直愁眉深鎖咁坐喺度，似乎有急事但又唔可以離席。到發言時先講到，原來佢同太太都買咗雷曼相關產品，要申報利益。八方據聞都成幾十萬，不過佢只係有苦自己知，冇諗住向銀行追究。
一場金融海嘯，捲走唔少市民嘅投資積蓄，亦捲走埋寶哥哥嘅英明神武。身為銀行界代表嘅寶哥哥，無法游說議員放棄用特權法，令銀行界唔少大佬發夢都估唔到要紆尊降貴去到立法會接受議員質詢。
明知噚日去立法會只係送死，難怪寶哥哥都冇乜心機，自稱戴黑色呔（查實係灰色至真！）兼白色袋巾嘅佢自嘲，一身深沉look都係準備去受死，預言今次結果係「死梗」，寧願輸投票但唔輸幽默。寶哥哥平時三點不露，即係開會到下晝三點離場，噚日罕有咁長時間留喺立會，雖然無法力挽狂瀾，但輸咗都算交足功課。