中央重錘出擊，動用4萬億元人民幣刺激經濟，中港股市應聲急彈，上海A股升7.3%，港股升3.5%，受惠股全面飆升，尤以鋼鐵股升勢最為凌厲，鋼股在跌市中跌到過晒龍，反彈亦一樣可以坐火箭。
重慶鋼鐵（1053）食正地震災後重建之利，升勢亦最急勁，高收1.71元，大升0.50元，升幅41.3%；馬鋼（323）第2位，收2.26元，升34.5%；鞍鋼（347）收6.30元，升27%；首長國際（697）0.90元，升20%。
鋼鐵股噚日都係以大裂口高開破位而上，重鋼已明顯突破50日線，連同鞍鋼和首國3隻，10日線都已升越20日線（馬鋼今日可加入行列），確認中期跌市已到底，開展大型反彈浪，消化後可再上。
鋼股中唔好走漏隻復星國際（656），噚日收1.98元，升0.32元，升幅19.2%，升得最小，主要係佢業務多元化，未引起股民特別注意。
復星經營環境可改善
其實，復星係今次中央十大措施促進經濟增長嘅前列受惠者之一，復星經營好多瓣生意，包括鋼鐵、礦業、醫療、房地產和金融零售業，刺激經濟方案包括大舉進行基建、放寬銀行信貸限制，以及加強基層醫療衞生服務體系建設等，同復星咁多瓣業務都有關連，復星股價跌到咁殘，好有機會藉今次「機遇」回升上合理水平。
復星去年7月上市時售價9.23元，上市後最高成15元，上月底跌到1.13元才回升，同高位比足足跌咗92.4%，就算同上市價比亦唔見咗87.7%，以一家咁大型嘅綜合企業而言，着實跌得過份，近日股價由低位回升，在1.87至1.52元間略作整固後，噚日破位而上，且有大成交支持，有力升破保歷加通道阻力，向2.80至3元目標推進。
復星08年（12月年結）上半年獲利19.2億元人民幣，大升132%，保守估計全年盈利30億元人民幣，每股盈利約53港仙，股價升到3元嘅預測PE都未夠6倍，若刺激經濟大計令公司經營環境有所改善，盈利仲可以秤番高啲。
郭兆誠