秋風起，三蛇肥。小弟生肖屬蛇，一向避免食同類，特別係嗰啲肥美大懶蛇。點都好，天氣一轉凉，見到賣衫舖頭有番啲生意做吓，都係件好事。不過，每年天氣因為開始吹北風轉凉時，孫柏文就覺得非常討厭，因為隨北風而來嘅，係令人唞氣窒住窒住嘅灰塵。
冇辦法，自十九世紀前宗主國嘅工業革命開始，一個地方喺生產力起飛時，都會出現嚴重嘅空氣污染。華南地區作為新嘅世界工場，當然都係一樣，後果就係一吹北風特區同享。
華南工廠爆結業潮
雖然天氣轉凉只有幾日，不過我發現今年冬天同往年有些少分別。以前開始吹北風時，喺將軍澳工業邨壹傳媒集團嘅煲煙大騎樓外望，係望唔到調景嶺，只有啡色一片。要知能見度有幾低，可以去Googlemap睇吓。
到今年雖然仲有煙霞，不過就可以清楚望到一棟棟五十層樓高嘅調景嶺住宅。我見到呢個情景，諗吓點解，就忍唔住諗起百靈達（2326）、合俊（2700）等，已經喺廣東省停產嘅工廠。唔通其中一個金融海嘯衍生出嚟嘅未預見後果，就係特區空氣可以改善？
特區空氣污染減少
好多人話經濟周期入面，有啲「自動穩定」現象（automaticstabilizer），即係經濟好時會自動煞車，經濟壞時就會令生產更有效能。景觀有改善，空氣更清新，唔好話啲乜嘢旅遊業，淨係特區人民買少咗要外國進口嘅咳藥水，嗰度都為我哋嘅貿易順差慳番筆。
真係諷刺，我一生都爭取減少空氣污染，不過當企喺公司大騎樓煲煙時，望到調景嶺，真係百感交集。
孫柏文
http://phatdat.blogspot.com