國泰航空（293）前主席唐寶麟靜極思動，又有新任務，一間以航空及航運業務為主嘅投資銀行及諮詢服務公司Seabury，成立子公司SeaburyAsia，仲喺香港設總部，亞洲區主席正係唐寶麟。至於佢喺太平洋航運（2343）嘅執行主席職銜會繼續，即係兩面兼顧。
舊同僚做助手
唐寶麟當年升做國泰主席，唔夠一年就突然請辭，理由係覺得做主席唔及做CEO咁好玩，可以落手落腳，家陣佢同時孭兩個主席，似乎做得好過癮喎！不過掉轉睇，都可以話主席呢啲位對唐寶麟嚟講冇乜細藝，所以撈多間都應付有餘！
SeaburyAsia亦公佈副總裁由IanO.Malin擔任，呢位Malin先生，之前喺AllcoFinanceGroupHK做咗8年，心水清嘅或會記得，唐寶麟離開國泰後，第一站落腳嘅，就係呢間專為航空公司搞資產管理及融資嘅澳洲基金。
據講Allco後來受次按影響，連累唐寶麟都要另謀後路。不過，今次佢喺SeaburyAsia做嘅嘢有啲似，兩位前Allco舊員可以再續前夢。