狂摩入城，英超沸騰！英國《太陽報》周二報道，曼城提出1,500萬鎊（約1.8億港元）年薪，力挖國際米蘭教練摩連奴過檔；如果成事，英超將進入Big5時代，真係好睇過戲！
教國米唔過癮
摩連奴同國米合約至2011年屆滿，一般估計要入城冇咁易。不過，摩連奴同意大利傳媒、老細莫拉堤、球員阿祖安奴，甚至心腹哥利斯馬都有牙齒印；加上意甲球員冇heart，聯賽競爭唔夠激，搞到摩連奴冇得囂，谷埋谷埋好易病㗎！所以，今次曼城開出紀錄性362萬港紙周薪，摩連奴絕對會心郁，加上少爺脾氣嘅莫拉堤唔襟激，容乜易開綠燈呢？
今時今日嘅曼城亦合摩連奴嘴型，尤其是舊老細車仔班主阿巴財困，講明1月份冇得再增兵；當年被車仔踢走嘅摩連奴，絕對可以大事報復一番，用阿聯酋老細無盡金錢，將泰利、林柏特……逐個撬晒過來。我求大俠諗起都忍唔住笑出來，報復心咁強嘅摩連奴肯定會大叫：「你都有今日啦！油佬！」
艾蘭奴再插曉士一刀
另一方面，曼城領隊曉士今日會飛去阿布扎比「面聖」，執行李之際見到英國《太陽報》篇報道，肯定心都凉咗一截。鬼咩！繼祖奧、羅賓奴後，第3名巴西兵艾蘭奴亦公開要求解釋，點解上仗聯賽對熱刺冇得踢！唉！做老細都要向下屬解釋，曉士做落去仲有咩意思呢？不如見到班主蒙蘇嗰時直接遞辭職信好過啦！
若摩連奴真係回歸英超教曼城，中場韋拉會唔會跟隨過檔呢？今季加盟國米嘅蒙達利咪好老襯？十劃都未有一撇，就搞到我求大俠聯想不絕，各國傳媒爭相報道，摩連奴果然係頭版先生，英超有埋你就perfect啦！