阿爺決定攞4萬億（人民幣·下同）救市，呢個天文數字引起中環人嘩然，亦令唔少中環人諗起摩根大通首席經濟學家龔方雄，因為佢喺3個月前講嘅說話，𠵱家應驗咗！噚日佢仲特登出個報告為自己平反㖭。
預言成真仲大十倍
話說龔生8月中出咗份報告，爆出阿爺可能用3000億至4000億銀救市，即時震驚中港金融界，覺得佢大言不慚，搞到「股」城風雨，仲俾行家美林炮轟。
連首富超人亦忍唔住出聲話：「如果有人利用呢啲消息賺錢，就真係罪過。」
唔知係咪頂唔住輿論壓力，龔方雄改口話呢個只屬個人建議，唔係政府觀點喎。點知今日救市成真，阿爺攞成4萬億銀出嚟，比起龔生講嘅真係小巫見大巫！
沉寃得雪，龔方雄即時出番個報告，話自己當年只係預測4000億，家陣阿爺攞出嚟嘅，大十倍㖭呀！言下之意係：話我講得誇張？阿爺仲誇啦，我唔係亂吹水㗎！
唔知係咪華華多心，總係覺得份報告同一般報告有啲唔同，用字語氣充滿人性，睇得出佢寃氣盡吐囉。