中央救市,好景只有一日,大行同基金基本上仍係睇淡,噚日又再全面出擊,大市跌勢再起,恒指收市大跌703點,險守14000點大關,收14040,跌幅4.77%;中資股有救市大計「照住」,始終有較強勢表現,H指收7136,跌275點,跌幅3.72%。
鋼鐵股仍係以首長國際(697)最強勢,最高1.07元,雖回收0.98元,仍有8仙進賬,升幅8.8%;至於噚日推介嘅復星國際(656)亦逆流而上,最高2.26元,收2.03元,升5仙。
首國上月底俾基金大洗倉,最低插到落0.385元,直情係世界末日咁款,但擰轉頭,竟然脫胎換骨,大戶買盤係咁掃,短短兩個多禮拜,由低位回升成180%(昨日最高1.07元),成為今次反彈市勁股之一。8月中首國仲在2元水平,兩個月時間大跌8成;跌得急,反彈必勁,冇錯嘅。
除首國外,中國遠洋(1919)係另一隻被大洗倉嘅股票,但有咁耐「慘情」,一樣會有咁耐「風光」,第日大戶買番轉頭,升幅又會以倍計。
預測PE唔夠1.8倍
中遠點「慘情」?去年10月底,衝上40元大關,最高40.80元,一年後,落到2.55元,大跌93.75%,近日由低位回升,上到5元水平後整固,但大行仲係咁洗倉,噚日更由高價4.93元插到落4.30元,雖然尾段有「對抗」,收番4.45元,但仍大跌0.45元,跌幅9.1%。
首國洗倉後轉勢,都係一兩日間嘅事,難保中遠唔會重演。以08年(12月年結)計,中遠每股盈利應有2.50元,預測PE唔夠1.8倍,家吓航運業已衰到貼地,睇波羅的海指數,近日似有見底回升之勢,若確認,航運股就會大翻身,要昅實中遠,現時正營造緊複式頭肩底,頸線在5元,一升破,目標係7.50元,屆時PE都只係3倍!
中遠股價跌得咁殘,主要係反映近期航運業不景氣,但中國用4萬億元人民幣刺激經濟,對航運業亦會有正面作用,業界人士對前景亦較樂觀,普遍認為明年波羅的海指數將會回升。波羅的海指數由去年5月的高位11793大跌到近日的815點,明年可望回升上3000點水平。
郭兆誠