殺校潮由小學殺到去中學，立法會新丁梁美芬話，佢嘅小學母校荃灣信義學校都因為收生不足，06年收到教育局殺校令，最諷刺係知道殺校前一個月，佢先啱啱捐咗兩萬蚊畀母校設立四個獎學金。
賴皮本色激親鼠王芬
鼠王芬噚日喺立法會上，連番質問教育局長孫公點解大開殺戒。梁美芬話，學校有個牌記錄佢好多年前喺小學會考中攞高分，之後升讀名校聖保羅男女中學，如果小學被殺，威水史亦會冇埋。
大嶼山新界鄉議局南約區中學喺舊年關門，梁美芬話佢都有參與救校。呢間學校以搞天文出名，佢話呢啲特色學校，孫公應好好保留。點知孫公再展賴皮本色，九唔搭八話大嶼山夠黑可以睇到星，市區出面有燈光睇唔到，激到鼠王芬紮紮跳。
孫公話，要收生不足中學停辦，係基於學生利益。不過就俾張文光等踢爆，話因為明年起推行新高中，經常開支要多9億元，𠵱家咪要殺校嚟填數。孫公都好坦白話，學生人數少咗一大截，當然要減少資源，好似一圍菜，原本12人食，如果剩番6人坐，唔通繼續畀咁多餸咩？睇嚟孫公好堅定要由摩西變「殺旦」。