有些說話講出來，某些人反應可能好大。好似領匯（823）要求加租，在自由市場經濟之下有乜問題？如果有關商舖唔值呢個價錢，市場自會作出調整，經濟環境承接唔到高價，你喊價幾高都冇用。
換句話講，業主為求利益而加租，但並無向固有租客截水斷電，結果新客阿甲肯畀足錢承租，原本租開個舖的阿乙不願高價續租而走人，咁樣可否罵業主「不仁不義」？
近期領匯要求向多個屋邨商場要求加租，在民粹主義漸強的香港當然鬧出不少風波，家陣搞到領匯個CEO下個月要到立法會解釋加租事件。如果當初領匯未能上市，咁都可能講得通，但家陣領匯已在股市掛牌，符合市場遊戲規則去做嘢，其實有冇錯呢？
自由市場從來都係一場淘汰賽，你覺得租貴，大可以唔租，況且個舖租予任何人業主有自由，冇話一定要租畀邊一個。
能否加租不明朗
領匯05年至07年間翻新旗下商場，目的明顯不過，坊間有份券商報告指出，09年至2010年有超過六成租戶將重訂合約，市場預期領匯租金收入因而上升，帶動盈利增長。但家陣經濟下滑，變相助長民粹意識高漲，若然最後搞到加租不成，反要減租，領匯股價難免受壓。
方星俠