行行唔只會出狀元，仲會出埋口術！當然唔係用茅招嗰隻，而係行內術語。一堆聽落似懂非懂嘅字詞，行內人知，外行人懵。聽極唔明笑爆嘴？今勻一於數出六個行業嘅術語畀你估，大爆佢哋嘅暗號，學定幾個傍身，就知佢哋有無背後講你是非啦！
記者：王震遠
協力：吳允冲
攝影：梁細權
鳴謝：露斯餐廳場地提供
六行術語大解構
最近有個新興術語深受各打工仔愛戴，佢就係「射波」！射波即係突然唔返工咁解，有人話因為發音近似卸膊，又有人話似足球場上射波咁射咗畀人，邊樣先真就無人知。其實各行術語設計都不外乎幾個定律，一係玩簡稱，一係食諧音，再唔係就玩借代，用另一樣性質相近嘅事嚟形容，既搞鬼又唔使畫公仔畫出腸，除了以上提及的，還附加常用術語話過你知。
茶餐廳術語
茶走＝普通奶茶會落砂糖同落奶，茶走就指唔落砂糖同鮮奶或淡奶，改為煉奶。
籮友＝個名有少許核突，其實只係食諧音，菠蘿油咁解，不過望望吓又幾似半個實物喎。
炸包＝直截了當將西多士叫做炸包，不過我建議叫做炸方包會易理解啲。
公子＝公子個名好高貴，公司三文治價錢一樣高人一等，叫公子可能因為簡寫兼諧音。
凉茶＝一向茶記叫奶茶就咁叫茶就算，凍咪即係凉，凉茶指凍奶茶啦。
306＝06就知係檸樂啦，206就指熱檸樂，咁306又係咩呢？206加啲嘢咪成為306囉！加咩？加薑呀！
肉酸＝好哋哋一個肉絲炒河，變成肉酸炒河，肉酸咪即係肉絲囉！
打爛＝炒個飯，點解叫打爛？因為諧音似啦我估。
雙扣＝雙扣唔係指扣家用零用錢，其實係指扣起啲餸同啲飯。
敗家仔＝即係阿華田，問極都無人知點解叫敗家仔，但試過幾間茶餐廳又真係個個識。
肥妹＝朱古力就係肥妹，唔通因為肥妹鍾意食朱古力，所以索性叫肥妹？
和尚跳海＝滾水蛋呢個名我有十幾年未聽過，原來有個咁型嘅術語。
燒衣＝入茶記order個亁燒伊麵食，聽到夥計大叫「燒衣」，真係有啲唔吉利，其實只係亁燒伊麵嘅簡寫啫。
信用卡推銷員術語
鯊魚＝形容一啲唔使sell都自己識游埋嚟申請嘅客，本應受歡迎又點解形容得咁得人驚呢？
禮物黨＝一班唔交文件，申請完淨識拎禮品走嘅客就叫禮物黨，呢個黨應該幾多黨員。
Hou仔＝Housewife咪即係家庭主婦囉，純玩諧音都好易估。
雙飛＝同一時間連叫到兩個客人申請。
堅踢＝即解認真做嘢，唔再hea住跑數。乜佢哋平時好hea㗎咩？
俾人閹＝客人申請銀行A卡時，俾另一個sales推銷銀行B卡，呢個行為形容為俾人閹。
的士大哥通水術語
猜枚＝話你支旗係猜枚，即係唔係15就20囉，嫌你車程短車資少呀！
加油＝加油在行內有兩個意思，架車要入油，司機自己都要加油，即係去開飯。
空手道＝聽落好型，其實話一啲機場客兩手空空無行李。點解司機咁擔心，因為每件行李要加錢嘛！
石仔＝司機大佬叫行李做石仔，我估個名係因為「好似石仔咁重」咁得嚟啩！
福星＝記唔記得香港有一系列五福星電影，叫慣五福星，叫叫吓咪將福星變成形容五個人囉。
麻鷹/舖頭＝飛機個樣似麻鷹就唔難估丫，點解機場又叫舖頭，莫非因為成日要喺嗰度做嘢？
巴士司機術語
乳豬盤＝平時上車唔知碇落車，就會走去睇吓路線圖，原來就係叫做乳豬盤，唔通因為條邊係紅色？
斷纜＝巴士本來一班接一班，斷纜就指中間有班車甩咗班。
冷馬＝熱狗就知係無冷氣巴士，咁有冷氣你又知唔知？就係冷馬啦。
蛇車＝早上下午返工放工時間，開出嘅特別車，就叫蛇車，因為Special個S字頭似蛇。
賣血＝意思指車長本身放假，都被call番開工。
皇家飯＝聽落個名好架勢，實情只得半個鐘頭食飯時間就叫皇家飯。
空中小姐術語
間間航空公司對同一事物可能有唔同術語叫法，不過其實都係大同小異，得個知字。
Deadhead＝指空姐照要返工不過唔需要做嘢，只係當客人咁坐喺度搭飛機，第二程機先做！
機佬＝（日航）機佬絕對無指人哋性取向嘅意思，而係指飛機師咁解。
哪渣飛＝（國泰）空姐會叫一啲最平最cheap，無得調機又限制多多嘅機票為之哪渣飛，張飛本身亁淨㗎。
BC＝（國泰）BC即Bar&Cabin，指初級空中服務員，聽個音又幾似Busy，佢哋又真係最多嘢做喎！
907＝（國泰）說話國泰每日有三班來回馬尼拉嘅機，最早班機叫CX907，因為班機內多數係由馬尼拉人乘搭，久而久之就用907嚟形容膚色較黑嘅人。
報紙＝（國泰）形容編更表上嘅duty編得又短又密，密密麻麻十足十份報紙，形容得幾傳神喎！
波鞋街售貨員術語
尤仔＝一至十喺波鞋街各有代號，順序為丁、元、王、叉、仔、共、廿、分、尤、平；「仔」除咗解五之外，仲可解為半碼。
蛋＝蛋即係鞋墊，會唔會因為似荷包蛋呢？
章鞋＝章即係畀客人試，章鞋即係客人試鞋。
翻章＝章鞋即係試鞋，翻章就指畀客人試同一對鞋，不過當中售貨員會扮拎過另一對畀客。
包孖二＝孖二指鞋嘅尺碼；如果指包孖二，即係客人要指定size唔使試。
籠＝入店內嘅客人就叫籠，如果有客人想試鞋，佢哋會叫有籠章。