擾攘咗個幾月，立法會聽日終於表決係咪通過運用權力及特權法徹查雷曼事件，一班雷曼苦主當然希望議員投贊成票，方便日後調查可以水落石出，唔使面對掣肘多多。所以苦主們呢幾日落多兩錢肉緊，努力拉攏游說班議員。
立法會係分組點票，雷曼苦主大聯盟召集人陳光譽話，直選組別已經數夠票，但係功能組別仲未穩陣，關鍵係民建聯班保皇黨肯唔肯轉軚。
陳光譽話手上嘅功能組別票，計晒數只係得12票，包括泛民、自由黨、工聯會仲有勞工界李鳳英，差最少3票先百分百穩陣，所以佢哋呢幾日四出約見功能組別一班游離議員，好似醫學界梁家騮、工業界林大輝同埋建築、測量及都市規劃界劉秀成。呢幾位議員同苦主見完面之後，雖然都唔肯明確表態，但陳光譽話個別有正面回應，相信投支持票機會好高。今日就見埋資訊科技界譚偉豪、保險界陳健波，總之一票都不能少。
民記未計掂數唔表態
查實搞到班苦主咁頭痕，皆因議事堂內第一大黨民建聯未計掂條數，遲遲唔肯表態，佢哋喺功能組別有區議會葉國謙、漁農界黃容根、進出口界黃定光3大票，如果投贊成票就大局已定。陳光譽話噚日苦主們去完民建聯總部，覺得民記主席譚耀宗仲好似想息事寧人咁款，搞到班苦主個心都凉咗半截，擔心民建聯最後會唔會出彈弓手，所以一眾苦主都希望譚主席同民建聯分清楚黑白是非，做少一次保皇黨咁話。至於好似黃宜弘、石禮謙同林健鋒呢類一早表態投反對票嘅保皇黨，苦主決定慳番啖氣，費事搵。
雷曼苦主大聯盟呢幾日已經響應公民黨呼籲，不停向議員發電郵，旅遊界嘅謝偉俊一早表態投贊成票，電郵郵箱都照爆。
大聯盟聽朝一早會由遮打花園遊行到立法會門外集會，陳光譽話到時見到上述嗰啲游離議員，苦主們將會重點埋身肉搏進行游說，等佢哋知道苦主有幾肉緊佢哋嘅投票意向。
長毛梁國雄今日會深入虎穴，陪班苦主一齊去等民建聯開會決定點投票，長毛話如果民建聯聽日投反對票，佢一定會有所表示，但絕對唔會再掟生果，做乜就暫時保持神秘感，總之唔會輕易放過保皇黨咁話。
mailto:[email protected]