好一套《蘇Good》，有人讚有人彈，嫌佢嘈喧巴閉乞人憎？亦不得不服阿蘇影響力驚人。節目內，阿蘇開心推介嘅玩智力IQ珠拼圖，𠵱家通街都係，睇落幼稚，卻難度十足的確好玩，一眾助手、明星都俾佢考起。一句到尾今期佢最Hot，你今日玩咗未？
記者：許維雅
攝影：梁細權
高級題全軍投降
大部份IQ智力珠拼圖都會附送說明書，當中有過百條初中高三級難度試題。咪睇12件珠仔拼圖好簡單，要啱啱好砌番落三角形黑板，絕非易事。考一眾助手歌星，初級題，人人幾秒完成，升一級玩中級題，有人開始叫救命，埋尾試玩高級題，慘，全軍覆沒，無人做得到高級組畢業生。
《蘇Good》節目助手Kendy
「之前未玩過，我一向將智力收埋，哈！第時我生BB，一定買畀佢鍛煉智力。阿蘇平日係咪成日玩？唔知呀，我無見過囉，可能喺屋企玩呢。」
阿蘇助手兼商台DJ泰山
「呢個珠仔遊戲，用嚟打發時間都幾好，我平日玩開網上智力Game，以前會同阿蘇鬥快玩數獨。阿蘇多唔多玩呢塊板？我瞓喺佢隔籬呀？鬼知咩？」
明星、助手、歌手、街坊齊齊試玩！
一分錢一分貨
市面上嘅智力IQ珠仔拼圖，玩法同設計一樣，但價錢差別好大，十幾蚊貨仔質素明顯較差，說明書又簡陋，畀多$10，質素已經三級跳，仲有埋詳細說明書列出180種玩法，題目更多，詳細教你玩埋立體砌珠法，女人街更有$69貴價貨，過千種變化真係有排玩。一分錢一分貨，自己揀啦老友。
亮相《蘇Good》就係呢盒智力IQ珠仔拼圖，有180種玩法，仲可以砌立體，夠你玩幾年，約$20至$25。
全城熱賣！
港人賺錢轉數快，呢盒智力IQ珠仔拼圖，由亮相《蘇Good》到𠵱家通街都係，不過兩星期時間。女人街、花園街、廟街嘅文具舖同小販攤檔有得賣，實屬正路，但連報紙檔都速速入貨、阿婆推車獨沽一味賣珠仔兼大嗌：「阿蘇推介！」就真係估佢唔到，最好笑嘅係，賣嗰個都唔識玩呢吓先搞笑！
土瓜灣書報攤
唔願上鏡老闆娘：「早幾年都賣過呢隻珠仔玩具，蝕本賣$10都無人吼。阿蘇一玩啫，搞到𠵱家好多人買。」
九龍城文具舖
文具舖老闆：「最高峯一日賣20盒，早排想入貨，可能太多人搶，廠商造都造唔切。」
廟街小販檔
廟街有五、六檔賣緊智力IQ珠仔拼圖，$10有交易，但質素好差。
銅鑼灣走鬼檔
走鬼檔婆婆不停大叫：「阿蘇推介呀！」擺明食熱潮，全車$20任揀。
網上熱話
《蘇Good》出街，各大討論區議論紛紛，網友問邊度有得買，更有人網上放貨。（ http://www.discuss.com.hk/viewthread.php?tid=8364000）
網友wai1231：「呢d（啲）玩意十幾蚊買黎（嚟）玩下冇（吓無）妨，我見到有鋪（舖）頭賣到七十蚊……」