地心探險記　藍光3D黑白片!?

地心探險記　藍光3D黑白片!?

當《地心探險記》上畫時，可能有唔少觀眾專程去睇立體版，如果睇完未夠喉，新返Blu-ray版就可以讓各位再次回味！BD版內將附有3D及2D版，而且隨碟會附有4副3D立體眼鏡，家中亦可睇到激爆場面。

記者：許福合
攝影：陳盛臣
Model：Fion

■一開始可以揀2D或3D版畫面。

■大場面環境，有明顯前後景。

■後段恐龍追逐戲，3D效果亦好勁。

電視夠大3D更出

當從Menu內選擇睇3D版後，畫面進入「立體效果」。只用肉眼睇，間中畫面出現兩層畫面，像Outfocus或近視一樣，但用3D眼鏡，即見立體效果，如開場礦場一幕，或中段惡魚標出來，真係嚇一跳！
整體效果雖唔及廸士尼立體影院咁誇張，但都夠過癮。可惜有利必有弊，用立體眼鏡去睇，畫面顏色無晒，似睇緊略偏黃的黑白片，買隻BD返嚟睇黑白片，真係好難令人接受，加上好易睇到頭暈，難以由頭睇到尾。
至於如何睇到最佳效果？電視越大越好，甚至可用投射，效果更佳，但受電視所限，當出現前後景時，3D效果才越明顯。最後提醒你，買行版DVD只有標準版畫面。

■隨碟會送4副立體眼鏡。（$246）

試睇評語

■Ming：「立體效果好正！可惜畫面無顏色，我諗我只可以睇到幾分鐘，會頭暈。」

■鄺生：「立體效果幾得意，睇一陣都幾過癮，不過失望係無色，點立體都無用。」

■陳生：「過癮吓就好囉！2百幾蚊買隻BD碟?有立體效果，但畫面好似黑白咁。」

■Simon：「最有印象一開場礦場過山車，3D效果好勁，不過睇一陣就要休息吓。」

查詢：DVDPro（23326326）