訪問過多位星媽星爸，大家都說做父母的心情興奮又驚喜。年頭曹永廉（Raymond）一索得男，屬計劃之外，理應更加驚喜，但原來外表開朗的他第一次得知女朋友懷孕時，反應只是「驚」，然後是徬徨，最主要原因是擔心未能好好照顧囝囝。直至抱住Brandon這個「實物」，才真正感受到「喜」。
記者：林佩婷
攝影：梁細權
Model：OwenLau
接連的意料之外
問到點解咁驚，緣自Raymond自覺還未準備好。「若未有BB，我可能會再過兩三年先結婚。雖然我都40幾歲，但都未有諗過做老竇。當太太好開心話我知有咗，我好徬徨，驚會有好多嘢改變，例如工作上定位唔同咗、角色選擇可能少咗、唔能夠照顧好佢哋、咁啱當時我準備同TVB簽經理人合約，又驚公司唔簽……」
雖然Raymond做藝員多年不算大紅大紫，但情況看起來也不像他說的那麼糟，誰知他搖搖頭：「我認為要成家立室最起碼要有層樓，BB唔係生咗出嚟就算，仲要照顧。兩年前我投資有少少失利，所以買樓大計仲未成功。本來諗住要好好計劃先結婚，所以生BB呢個消息無疑令我失預算。」結果，好彩公司開心照簽約、觀眾開明仲好支持爸爸形象。
早產亂晒
「直至3、4個星期後，發現好多活動或廣告搵我，我先真正放心落嚟。再過3、4個月，陪太太去照超聲波，見到BB手指郁郁、4D相，先首次感受到『自己真係有個仔喎』，到真正抱住實物，至識得興奮。」問到Raymond現時算不算安穩，他自評65分，說還有很大的進步空間。
通常準父母早早買定嬰兒用品，雖然囝囝早產一個月，但無理由連BB床都未買？「BB預產期2月，之前我拍緊劇，諗住12月左右拍完兩公婆一齊去買。點知有日剛好放假喺屋企，佢下午突然作動，早成個月。原本無諗住陪入產房，但嗰刻為安慰太太唔入唔得。一見佢大力呼吸就幫手扶實，好彩差唔多4個鐘就搞掂。」
軍師教湊仔
好多準父母都會不停看書增值，Raymond就從來無咁做，因為他背後有一班軍師。「當太太有咗，自然好多父母走埋嚟同你傾偈，分享心得，好似安仔、錦鴻等等。我哋仲有個專業顧問馬海倫，佢本身已有孫，有好多育兒經驗，屋企好多親人做醫生，成日教我哋點煲粥仔、唔舒服點處理。有時好多人都有唔同意見，若果無危險性，我會樣樣試清楚，睇吓邊款最啱BB。至於小朋友生活瑣事就交由太太負責，我最重要就係努力工作，令家人生活得更有安全感。我唯一要求BB係要有禮貌同責任感，呢個大原則唔可以退讓！」
即Check
搞喊人哋個仔！
Raymond謙虛的給自己65分，我們也找來了歲幾的小模特兒Owen來測試Raymond一年下來的湊仔實力。
