最近有位法律界老友來電，問星俠點睇港股後市？內銀股幾時買得？如果大市再大跌，有乜好股可以趁低位擇肥而噬？念在老友曾幫我不少，向他傾囊相授，提供了幾隻自認為不俗的優質股供他選擇，並強調待大市再度重挫時買進，相信風險有限。
私人談話，不宜多透露，總之該位老友幾個月前見大市疲態漸露，心癢難熬想買貨，當時星俠建議佢不妨再多等一會，最緊要戒急用忍，時至今日，證明冇睇錯。今次老友因本身行業之便，八到四周圍經濟好唔掂，裁員又減薪，經濟景氣轉冷，對港股大概形勢已心中有數，只想找星俠印證一下睇法。
分段收集長線持有
講真，對港股後市走勢，星俠的確有保留，想炒股食大茶飯，未係時候。老友則反問一句，若嫌花多眼亂不想買股票，見低就買追蹤恒指的盈富基金（2800）得唔得？如果用長線持有策略，分段收集盈富，當然冇問題。
盈富末期息0.45元，連同今年4月底中期息派0.23元，合共派息0.68元，股息率約5厘。坊間好多人話投資基金，其實盈富可謂其中一隻最好的基金，今日買，明天股市大升即可以沽，買賣方便，使乜好似坊間其他基金要供三、五、七年先收到錢？
方星俠