保華（498）1年插咗90%，手頭揸住洋口港項目，長線增值潛力可大可小，保華要昅昅。保華近呢幾年轉型搞祖國港口、配套及物流業。主打項目喺華東嘅洋口港。單係08年度（3月底止），洋口港已平整土儲（4.1平方公里），已經為保華帶嚟近6.4億銀重估增值收益。
已平整部份，講緊只係佔咗洋口港總面積嘅10%。若果剩餘土儲嘅價值全部反映，講緊高達57億銀，等於保華每股增值3.8元，再打個5折，NAV都增值1.9元，增值潛力真係可大可小。
保華1年嚟急跌9成，現價得番0.32元。要咁睇，個市今年嚟咁插法，市場已經失晒信心，就算唔理資產重秤，保華最新NAV2.24元，現價折讓都講緊86%。以保華現價翻一番到0.64元計，到時集團嘅NAV折讓，仲係超過70%，港口股當中，呢個折讓水平，仍然係吸引到痹。
新中負債低博得過
新中（917）亦係1年大插八成嘅股，最新NAV7.74元，現價（1.68元）折讓講緊78%。市場裏邊，市值晒士近磅嘅中字內房股，同樣起碼跌七八成，但折讓水位，仲係講緊40、50%，講折讓吸引，新中彈出嚟。又中字內房股經過上年以嚟擴充，部份淨負債比率上到50、60%。而新中最新淨負債比率約莫30%，講財務亦穩健得多。博內房股反彈，買新中，以NAV折讓收窄到70%，新中要見2.3元，現價回報率37%。
錢雋