股壇大好友波浪許請食飯，地點當然係佢嘅飯堂賀菊啦。嗰晚波浪許搵咗左丁山之外，仲搵埋股市老手前輩阿冠一哥、老曹及大經紀Ｈ等，加埋有起碼一百三十年股市打滾經驗。經紀Ｈ話：「今晚仍然坐喺呢度同你哋飲清酒，吃魚生，覺得好幸運，我出道以來，歷經七三/七四股災，八七股災，八九民運事件，兩次波斯灣戰爭，中間有九一一與九七金融風暴、沙士，以至今次金融海嘯，仍然企得穩，食得好，真係要多謝上天眷顧。」正是浪淘盡多少風流人物，經紀Ｈ人在江湖，由財經記者，研究員，經紀，至到今日成為證券集團CEO，當然係為人醒目，作風穩健與洞悉市場風險之故，但其中不免有一啲幸運成份，故此經紀Ｈ話要感恩。
冠一哥本是外匯、貨幣（或拆息）市場高手，近十幾年鑽研世界股壇，當然係功力深厚之輩，至於老曹，三十幾年前已經搵到五十萬現金，點知七四股災之時，恒指去到四百點，以為股市已經跌完，大手入市，結果蝕清光，後來憑一點一滴咁樣累積資金，卒之大翻身，成為散戶典範。既然好手在場，左丁山自然要問後市點睇，冠一哥話未有咁快跌完，經紀Ｈ話到𠵱家仲記得七三年恒指由千七點插到七百點，大反彈至千二點，好多人立即入市，繼而插水至四百點，至此水平，大戶散戶再度入市，點知續跌至一百五十點，可說屍橫遍野。微言大義係乜呢？經紀Ｈ叫左丁山自己諗。老曹就話抗日戰爭自九一八事件開始，有八年抗戰。今年香港股市有九一八事件噃，你哋諗真吓！
左丁山翻查今年九月十八日恒指，發覺恒指曾經最低跌咗1353.47點，但收市報17632.46，只係跌咗4.73，當日最高最低相差1566.23，可謂驚心動魄，到咗九月十九日，恒指大升1695.27，收市報19327.73，張張報紙都讚好不絕。唉，如果當時沽清貨，就蝕少好多啦。唔怪得老曹提起九一八，當日之樂觀情緒，如今安在哉，大凡相信政府救市，相信政府有力護盤者，都係天真之輩。波浪許就唔天真嘞，佢話經多方觀察，升浪將起，大家要吼實喎。