一場金融海嘯，令好多人身家蒸發唔少，受影響嘅除咗成年人，喺大陸嘅留學生都感受到。據新華網報道，以前內地唔少校園貴族唔使做兼職，放學後仲可以嘆杯Starbucks咖啡，家陣就唔得。
好似由韓國去四川大學留學嘅李廷起，喺中國已經3年，屋企每個月畀佢30萬韓圜，喺130韓圜就換到一蚊人仔嘅時候，都唔知幾好使，但家吓要180韓圜先換到一蚊，為咗唔想搞到屋企負擔太大，佢周末要走去教韓文，賺啲使費。
至於喺成都嘅美國留學生薩拉仲慘，家鄉花旗喺金融海嘯中心，屋企人同佢講，就嚟負擔唔到佢嘅學費。以前薩拉幾乎日日嘆杯Starbucks，家陣佢買個咖啡壺喺宿舍自己煲。佢話冇諗住返美國，打算留喺中國做繙譯，話晒中國機會多啲喎。