港府上個月23日公佈特區護照持有人可免簽證去巴西90日，但有旅行社最近收到巴西駐港總領事館通知，話港人去當地仍需簽證。八方覺得奇怪，點解朝令夕改咁兒戲。
知情人士同八方講，其實港府同巴西喺05年已達成免簽證協議，但巴西政府遲遲未搞掂內部程序，直至上個月，巴西總領事館書面通知港府已辦妥手續，政府先至正式公佈免簽安排。點知情況有變，港府都矇查查唔知發生乜事，了解後發現原來係巴西嗰邊擺烏龍，有人以為做妥程序，其實未成事。
港府噚日補鑊，表示已出發前往巴西嘅特區護照持有人，可免簽證到巴西，而本年11月13日或以後出發者，則仍要簽證。至於幾時先真正免簽，暫時無期。