今年婚事特別多，李嘉欣和許晉亨婚期在即，許晉亨兩個舊愛昨日同場出席活動，同聲祝福。前女友劉嘉玲先晒做梁太的幸福生活，再讚兩人郎才女貌，十分登對。至於亨亨前妻何超瓊則為前夫找到合適伴侶開心，更落力催他們造人。
劉嘉玲的舊愛許晉亨上月和李嘉欣排期註冊結婚，有指他們將於本月23日在許父許世勳的石澳大宅舉行婚禮，婚後李嘉欣更會積極造人，為許家添丁。昨日許晉亨的兩個舊愛，前妻何超瓊以及前女友劉嘉玲一起在中環出席名牌BottegaVeneta酒會。
買名牌偉仔找數
梁太劉嘉玲首先到場，並大談買BV袋，她說：「好貴，唔捨得買，買嘢都要睇價錢。」記者問不是由偉仔找數嗎？嘉玲即時晒幸福說：「都係我啲錢，佢嘅錢即係我嘅錢，一家人嘅錢，梗係會心痛啦。」
問嘉玲究竟偉仔有沒有申請附屬卡給她？嘉玲說：「咁私人嘅嘢，總之我使佢錢，佢開心啦，男人搵錢梗係畀女人使啦。」不過，嘉玲強調二人財政獨立。
談到亨亨婚期近，嘉玲說：「我都係睇新聞先知。」會否恭喜他？她說：「佢都未打電話畀我，佢通知我先啦。」若亨亨派帖請飲，會否出席？嘉玲說：「會，未諗到送乜嘢禮，收到帖先啦，我都戥佢開心。」可覺得亨亨和嘉欣郎才女貌？她說：「係呀，好襯呀！」
提到何鴻燊讚何超瓊好過李嘉欣，作為超瓊好友的嘉玲即時站在好友陣營，她說：「唔好攞啲八卦嘢，不過做老竇嘅，做父母嘅梗係幫自己個女啦，100%支持，都係人之常情。」
至於亨亨前妻何超瓊，她跟嘉玲影完合照後一度拒絕做訪問，不過之後又大方談及此事，指不需賭王父親撐她比李嘉欣好，她說：「我有自己好處，有唔同優點，唔使同人比。」
超瓊催前夫快添丁
超瓊謂已恭喜前夫，但未知會否去飲，她說：「我聽聞好exclusive，未必請好多人，我都未收到帖。我都替佢開心，一場朋友，都想佢有個好嘅伴，適合自己嘅伴，最緊要快啲生仔，40幾歲，係時候啦，都要有自己家庭。」
至於感情狀況，超瓊如常表示隨緣，更指賭王父親有眾多子女，不會特別為個性獨立的她而擔心。
採訪：羅慧敏
攝影：陳慧安
