港股自上月底跌至10676以後，經過前陣子連日反彈上15317，累計升幅4641點，幅度達43%，近兩日走勢出現回吐其實好平常，而全球各國再掀減息潮，反映不少國家對經濟前景睇得較預期更差，因此減息對股市應屬利淡而非利好；不過下周市場將憧憬G20峯會或有良策救經濟，似乎後市又不應睇得太淡。
最近內地某些報道，指全國煤炭產運銷均同步萎縮，市場普遍認為向下調整勢頭未完，至於稍前神華（1088）管理層預期明年煤價仍有上漲空間，未知家陣咁嘅形勢，會否改口風？
資源價看跌 煤價難獨升
神華收入主要來自合約煤，佔75%，由於合約煤港口離岸價加埋稅項，每噸都不多過450元人民幣（下同），與現貨價逾900元有大段距離，所以集團雖認為環球市況不景，仍對公司充滿信心。
神華近期低位7.91元，其後強力反彈至16.38元，升幅107%！如果當日趁股海沙塵滾滾之際低位買到，現價14.26元，家陣食糊都好和味。近期各類資源股表現麻麻，有人甚至認為，與石油企業關係千絲萬縷的美國總統布殊快將卸任，高企的資源價格年代或可能同步謝幕。若然係，煤價好難獨善其身，買煤炭股都係等等。