煲呔幾個月前一擲110億元推出多項利民紓困措施，可惜冇諗清諗楚就出台反而擾民傷神，免收兩年外傭稅原意係好，卻因考慮不周令僱主、外傭怨聲載道，葉劉為民請命，提出永久撤銷外傭稅，不過政府唔制，使橫手搵民建聯出手㩒住葉劉，官員又暗指葉劉做法可能違憲，甚至驚動中央，要釋法咁嚴重。
咁大條罪名壓落嚟，葉劉不甘被屈，噚日開會時大發嬌嗔，指勞工及福利局局長張建宗好誇張，話永久撤銷外傭稅建議可能違反《基本法》，想嚇窒議員唔支持嘅做法有問題，好似拎住個核子彈周街行恐嚇人咁，葉劉一臉不以為然咁話，「點可以咁㗎！」
葉劉話男人唔應該兇人
張建宗對此冇正面回應，葉劉一於食住上，好不屑咁講：「公開又唔肯認，男人大丈夫唔應該咁做。」葉劉由高官變成議員，真正得把口，同大權在握嘅官員邊有得比？經此一役，八方相信佢對「只許州官放火，不准百姓點燈」呢兩句說話，會有更深體會，以前佢自己做官時，又何曾聽議員支笛？
其實葉劉指高官以「核子彈」兇人都係五十步笑百步，佢身在官場時同樣伎倆都玩唔少啦，怕炸彈？講笑咩！如果張建宗呢次用「核子彈」，咁要求人大就居港權釋法，否則有167萬人湧港呢個嚇鬼數字，又應該係咩級數嘅武器呢？氫氣彈、巡航導彈定係骯髒彈呢？
葉劉當年負責為港府還原《公安條例》惡法護航，指唔收緊遊行、集會審批程序，社會立立亂好大鑊，呢次葉劉冇攞「架生」，警方只係出動胡椒噴霧對付手無寸鐵嘅示威學生啫，同所謂「核子彈」比較，相信葉劉覺得好仁慈。
高官為壓迫議員支持政府，真係乜嘢大殺傷力武器都用得出，葉劉披甲上陣推銷《基本法》23條立法，衝鋒陷陣殺無赦，雖然好多人指出草案問題多多，然而佢充耳不聞，講到若然不立法，就會騷動、叛亂天下大亂咁恐怖，呢啲言論比所謂「核子彈」更得人驚，點解葉劉當時又講得出呢？現時政府唔敢重提立法，香港人一樣安居樂業，至於亂放「詐彈」嘅高官，好自為之。
mailto:[email protected]