好多人睇好《LittleBigPlanet》！不過估唔到銷數直逼一線大Game、兼玩勁缺貨；最新炒起價$390：「唓！有行貨啫（$328）。」對唔住！行貨派完頭輪已開始斷供，下批到貨期無聲氣，所以好多Game舖都收起晒、照炒水價。仲會唔會再推高？$400係一個心理關口，再上即係叫人唔好買，到頂喇！
NDSi玩正氣滯銷!?
Game場本周另一熱話，梗係剛到貨NDSi，機價由最高點$1,980直線下滑到$1,500，原因好離譜地因為玩唔到R4（即係玩老翻），再加上水貨得日文介面無英文，形成人人唔敢入市；須知齋機成本價都要$1,480，賺你$20仲要飛機貨，真係蝕到入肉囉！
索愛X1先達炒貴1成
「行貨都出咗啦，仲使乜驚買唔到？」Sorry！如早前提過，X1真係極缺貨，據Sales報料，除大型連鎖店有小量貨供應，先達舖一般只分得一、兩部（甚至無）！咁嘅情況惟有「吊高嚟賣」，呢款機原價$5,980，今個禮拜已被炒高$6,480，差唔多一成，估計仲有得上呀！
