英文記者小Ｂ去年在芝加哥大學畢業，住宿舍四年，對芝加哥南區十分熟悉。南區是貧窮區域，居民幾乎全部是黑人，犯罪率甚高，除咗去芝大之外，好多白人唔願去南區。十一月五日（香港時間），美國選出一位來自芝加哥，於芝加哥大學教書嘅黑人教授奧巴馬為總統，南區居民歡欣若狂，連帶小Ｂ在香港亦高興異常，今年暑假佢曾經一度想話返去芝加哥為奧巴馬做競選義工，後向現實低頭（打工支持自己生活），但就成為香港頭號奧巴馬擁躉，邊個話支持麥凱恩嘅話，佢就會與之爭辯不休。
奧巴馬大勝，創造美國歷史，仲得了嘅，小Ｂ來電郵話與朋友去朗豪坊飲番杯，以示慶祝。朗豪坊噃，價錢平啲咩？記者人工唔高，應要慳啲使。小Ｂ話：「你有所不知，朗豪坊酒店內有一日本餐廳，名叫Tokoro，附設酒吧，因有人打賭奧巴馬與麥凱恩勝負，輸者請飲第一杯（firstdrink），生效日期由十一月五日知道結果後，至到十二月三十一日為止，𠵱家我嘅偶像奧巴馬贏咗啦，一來去飲番杯慶祝，二來要為支持奧巴馬嗰位先生打氣，所以一定要去Tokoro！」
邊有人咁闊佬㗎，請晒所有人飲第一杯？仲要飲足近兩個月？半信半疑之間，立即打電話搵朗豪坊有關人士Ａ君問一問。原來Ａ君自己都唔知，要搵夥計問清楚，佢回覆話確有如此豪客，走入酒吧飲第一杯，對夥計講聲：「入Henry數」，呢位Henry就會找晒數，其實Henry支持麥凱恩，認為奧巴馬會輸也。
哦，Henry睇差一皮，同佢輸賭嘅Wilson輕鬆取勝，但得到嘅獎品唔係自己，而係去Tokoro附設酒吧飲酒嘅客人。左丁山笑Ａ君：「朗豪坊無端端做多唔少生意，呢位Henry君相信埋單找數簽到手軟。」Ａ君話：「未必嘅，酒吧頂多坐十幾人，如果客人飲幾杯至走，酒吧外排晒長龍，可能只會旺丁不旺財！」咁又係，話定畀小Ｂ聽先，等佢咪以為有免費酒可飲，喺朗豪坊排隊浪費時間。呢兩位Henry與Wilson，不知何許人也，輸賭一場，竟成為旺角佳話，現在全城外籍人士無一不知，更可能成為世界性花邊新聞㖭，令朗豪坊聞名世界。