香港喺十一月一日星期六舉行咗一場欖球大戰，紐西蘭對澳洲，大球場全場爆棚，氣氛熱烈，似足七人欖球賽，但本地傳媒似乎視若無睹，極少報導，如果唔睇《南華早報》，就根本唔知道有近萬名外國遊客特登飛來香港睇波。本地報章似乎有啲近視症，咁大型賽事在本港舉行，點解完全忽視之？
星期日跑馬，七樓廂房內有名人討論澳紐大戰（紐西蘭贏19比14）十分熱烈，有一位就非常不滿特區政府目光淺窄，唔肯大力宣傳。佢話：「欖球雖然喺香港係小眾活動，但曾特首成日話香港要做國際城市，唔係鄉下小鎮，有澳紐國家隊嚟香港打波，都唔幫手，一味官僚作風，好令人失望。」據講，政府官之所以官僚，係知道呢場球賽有商業贊助與電視轉播費，如為球賽宣傳，誠恐俾本地傳媒批評為「官商勾結」，故此大球場收足17%場租，但球賽場地欠佳，就一於懶理！
其實新加坡恨到流口水，好想呢類球賽在新加坡舉行，增加新加坡之國際曝光，就快建築一個非常現代化嘅新球場，希望搶到「生意」。何謂生意？今次欖球賽適逢在萬聖節（十月三十一日）之後，大量外籍球迷來港，將蘭桂坊、灣仔酒吧區擠到水洩不通，雖然話有金融海嘯期間，酒店餐飲生意依然旺到不得了。資深會計師W對左丁山講：「嗰幾日突然見到好多外地金融界人士在港，佢哋話來港開會，原來係要配合星期六嘅欖球大賽，特登飛過嚟！」
再問真吓，旅發局早知此事，曾在澳紐方面加強宣傳，吸引澳紐遊客來港，但因為海外宣傳，香港人不感興趣，故亦無傳媒報道。講起旅發局，因立法會有一位議員話要解散之，又適逢金融海嘯後，長途客來港大減，短途客亦跌，今年有排頭痛，睇數字，好彩短途客仍有增加，相信以後宣傳重點會以短途客為主，例如在台灣、內地，以本港西方節日特色（如萬聖節）作為招徠。台灣大陸幾難營造嘩鬼氣氛嘅，香港勝在玩得夠癲，吸引兩岸遊客來港可說審慎樂觀。