政務司司長唐英年講錯說話唔係新聞，估唔到接受幾個小學生訪問都出事。政府青年網噚日上載咗一篇叫〈唐英年司長這樣回答麥兜〉文章，細路問唐唐有冇一件事𠵱家最希望做到，問心嗰句，梗係想做特首啦，不過佢冇咁直接，只係話𠵱家最希望搞好西九文娛區呢個project。
榮升「唐爺爺」好受落
正所謂得西九、得天下，唐唐弦外之音，怕且班小學生聽唔出，要咁婉轉自爆心事，真係用心良苦。唐英年近日同馬會主席陳祖澤去四川省德陽市，到一間小學臨時校舍探訪學生，學生稱呼兩人做「陳爺爺」同「唐爺爺」，仔細老婆嫩嘅唐唐忽然榮升阿爺級，顯得好受落，笑逐顏開。
馬會早前公佈將撥款擴建德陽巿五中高中部中學，兩人此行去實地視察，立法會月前批出20億元協助四川重建，四川省領導下星期二嚟香港，會同立法會議員見面，討論最新重建情況，唐唐會代表政府請客食飯，有冇回鄉卡議員都可以出席。