人生有起有跌，股市此刻在低位掙扎，持貨者忐忑不安；碰巧阿仙奴亦是大起大跌，一時大勝對手令擁躉狂喜，但連對侯城同史篤城都照輸。唉，無法啦，一沉百踩難免，平常心看之，不過數個月後她們同股市可能又是另一番光景，做人要樂觀啲。不過今次《開倉版》先捧英冠添猛將嘅卡廸夫城，作客昆士柏流浪保不敗。
祖柏投效兩個月助升班
卡廸夫城同上屆一樣相當硬淨，今次作客未有新主帥人選嘅昆士柏流浪，竟開出「讓球主客和」[+1]，我認為相當過份；排名比對手高一級排第6位，近10戰作客3勝6和1負，賽績優秀，而且剛從新特蘭借得射手祖柏兩個月，可於今仗披甲，默契不成問題，進取者可博冷W。另外英冠首席愛隊雷丁，上仗作客大炒布里斯托城，後悔沒有將她們放上貼士表；今迎打比郡，雖然分頭大減，但人腳鼎盛兼周中未像對手要踢聯賽盃耗力，大捷可期。
今周戲肉，阿仙奴迎戰曼聯不能不提。阿仙奴雖然近期態沉，但我冇乜損手，擂台也冇貼過；只因實在太熟隊波，𡃁仔太多，欠穩定性，今次主場迎死敵曼聯，莊家開出主隊受讓平/半，牌面上非常合理。連正選雙箭頭都唔出得，加上隊波欠領袖型球員，面對這類大戰極為吃虧，更遑論擋得住C朗嘅曼聯呀？
阿仙奴受讓機會難逢
不過因為太多不利數據，莊家順勢開了個受讓盤，近年未見過，可以重新估計。曼聯計狀態，未及高峯，對侯城也失3球；計打法，料作客亦不會太保守，反有利阿仙奴打反擊。希望快翼禾確特復出，更希望我今屆重點留意球員CV（卡路士韋拿）能受雲格重用（一定好過賓特拿），眾小將在備受看淡下得以減壓，阿仙奴主場下盤實在機會難逢，希望我呢個倉旺一旺隊波。
是日投注：$1,700
上次賺蝕：-$50 本金：$100,000
結餘：$102,793
近5場往績：WWLWL
蘋果波神
水準有目共睹，長跟必有着數。