雷曼迷債爆煲，世上從此少咗一間跨國大行，多咗一批雷曼苦主。有人對「雷曼苦主」好有意見，唔係認為佢哋要求銀行賠償唔合理，而係認為政黨、傳媒指呢班人係「苦主」有問題。
據講有個文化界人士向民主黨曉以大義，引經據典指苦主係用嚟指命案中受害人家屬，民主黨為免被指誤人子弟，決定從善如流，由教育界議員張文光正式提出幫雷曼迷債事件受害人正名，日後新聞稿、內外文件一律改為「迷債受害者」。佢透露民主黨擬成立大聯盟，協助呢班人，如果名為苦主就大吉利是。其實叫受害人定苦主都好，八方相信佢哋都唔係好介意稱呼，最緊要係攞番老本，成副身家化為烏有，仲邊有心情咬文嚼字？