前商務及經濟發展局局長肥馬減磅有成，真正無官一身輕，現時在上海復旦大學講talk，十分逍遙。八方聽聞法國駐港總領事稍後會頒個勳章畀佢，表揚佢促進法、港關係。肥馬稱在位時同法國總領事有聯絡，都幾老友，可能因此獲睇得起獲獎，據講今年僅佢一個人攞呢個勳章，總領事下月中會舉行頒授勳章酒會。
卿姐都有聽到呢個消息，佢同八方講，屆時可能會去賀一賀肥馬，話晒肥馬做官時待佢不薄，冇玩親疏有別，肥馬接班人劉吳惠蘭都獲卿姐好評，卿姐透露劉吳局長已承諾派副局長蘇錦樑出席街頭論壇，解釋淫審條例諮詢文件，特別係網絡23條問題，卿姐強調唔係為難蘇錦樑，希望佢做齣好戲咁話。