港仔文化水平低，連鬧人都缺乏詞彙，動不動就爆粗，實在太無品。其實廣東話本身已經有好多關於食物嘅抵死俗語，鬧人啜核到肉。知道點用呢啲俗語，就算俾人鬧你菠蘿雞，都唔使一碌葛咁戙喺度，O晒嘴唔識駁嘴啦。
記者：吳允冲
攝影：譚盈傑、黃子偉
生果篇
菠蘿雞 PineappleChicken
【解釋】：專佔人便宜嘅無賴
【出處】：廣州波羅廟賣「波羅紙雞」，俾善信賣返屋企圖個吉利。除竹枝同紙外，真雞毛仲會黐喺雞身，引申歇後語「一味靠黐」，諷刺人鍾意佔人便宜。
【例子】：佢次次食飯埋單都借尿遁，正一菠蘿雞。
混吉 BlendTangerine
【解釋】：搞搞震無幫襯
【出處】：以前飯店，餐前會奉送一碗無湯料味精水，稱「吉水」，好多無業游民齋飲吉水唔點菜，唔畀錢拍拍屁股走人。生意做唔成，店主指呢班人混吉。
【例子】：試十幾件衫都唔買，混吉！
肉類篇
炒魷魚 FriedSquid
【解釋】：被解僱
【出處】：以前廣東人打工，帶埋被鋪留宿，被炒捲被鋪走人，形狀有如落鑊捲起嘅魷魚，故稱炒魷魚。
【例子】：老闆想炒我魷魚，等我遞咗封辭職信先。
捉黃腳雞 CatchYellowFeetChicken
【解釋】：捉姦在床
【出處】：公雞腳比母雞腳深黃，醒目唔易捉，不過死穴係鹹濕，當母雞出現，公雞會飛撲上前作勢交配，呢個時候公雞無防範，捉雞腳手到擒來。
【例子】：夠膽滾？捉佢黃腳雞先！
砌生豬肉 BuildRawPork
【解釋】：做假證據屈人
【出處】：「生豬」指Charge，解落案控告，粵音「差廚」，與「生豬」音近，稱「生豬肉」都係貪順口，更加生動。「砌生豬肉」全句就係有組織明屈，有製造不利證據嘅意思。
【例子】：佢砌我生豬肉，我無做過，我係寃枉㗎法官大人。
蔬菜篇
燉冬菇 StewWinterMushroom
【解釋】：被降職
【出處】：早年警員軍帽狀如冬菇，稱「冬菇帽」，便裝警員犯錯降職，做番軍裝就要戴番冬菇帽，俗稱燉冬菇。點解「燉」？因為「燉」同「褪」讀音近，有倒退之意。
【例子】：燉冬菇好過炒魷魚，起碼保住飯碗。
發漚豆
IssueSoakBean
【解釋】：眼光光，魂遊太虛
【出處】：豆芽係「發」同「漚」出嚟嘅，廣東人借用農業術語，暗喻難得正果，形容人得個諗字又乜都諗唔出。
【例子】：上堂唔留心聽書，淨係識得發漚豆。
拋生藕
ThrowRawLotusRoot
【解釋】：女人發姣放生電
【出處】：要激起性能力，男食韭，女食藕，女人生完BB會食生藕片進補。拋生藕，指女人食得生藕多，好耐未掂過男人，猴擒到要向男人放電。
【例子】：你睇，個女人着到咁性感，成個深宮怨婦咁，見到男人就拋生藕。
大番薯
BigForeignPotato
【解釋】：無腦遲鈍點極唔明
【出處】：1933年孔仲南於《廣東俗語考》有載銖刀（讀音薯刀）一字，即唔鋒利鈍刀一把，寓意人腦筋唔靈活，人蠢稱銖，銖薯同音，後來演變成「大番薯」呢個俗語。
【例子】：正一大番薯，同你講都嘥氣。
賣剩蔗
SellSurplusSugarcane
【解釋】：年過三十單身中女
【出處】：賣剩蔗也不一定是品質差，只是咁啱無人識貨，揀唔中，所以形容女人賣剩蔗，未必全部係貶義。
【例子】：死啦，就嚟三十歲都仲未有拖拍，我唔想做賣剩蔗呀。
油器篇
年晚煎堆 YearLatePan-friedPile
【解釋】：人有我有
【出處】：新年家家戶戶都會炸煎堆，寓意掃走一年霉氣。勸人搵老婆唔好挑剔，會搞笑咁講：「娶老婆，年晚煎堆啫！」但求人有我有。
【例子】：唔多鍾意我女友，年晚煎堆㗎咋。
老油條 OldOilStick
【解釋】：軟腍腍無火氣
【出處】：油炸鬼放得耐會變濕變軟，嘲笑人唔識反抗，寸佢唔嬲打佢唔避，令人無從對付吹佢唔脹。
【例子】：公司啲老油條，做又三十六，唔做又三十六㗎啦。
蛋囗 EggLoose
【解釋】：不中用嘅廢柴
【出處】：蛋囗炸到脆卜卜，入口香噴噴，但一咬即碎，碎完仲會散開三兩件，毫不硬淨，以此揶揄無鬼用嘅廢柴。
【例子】：你件蛋囗食嘢唔做嘢，做嘢打爛嘢。
甜品篇
女人湯圓 WomanSoupBall
【解釋】：特別討女人歡心嘅男人
【出處】：湯圓搓得圓㩒得扁，比喻男人老狗對女人百般遷就，形容男人異性緣好。
【例子】：條仔扮晒斯文，正一女人湯圓。
豆泥 BeanMud
【解釋】：情況堪虞
【出處】：豆與泥同樣微小，平凡到無人會注意，兩字並用，更強調糟糕不堪。
【例子】：大學畢業又搵唔到工，要靠阿媽接濟，真豆泥！
街訪：俗語無人識
喺中環做街訪，原來時下年輕人真係唔多識俗語，好多時都係照字面解，睇嚟要惡補吓廣東話知識咯。
Ann：「豆泥即係指細粒粒嘅嘢，定係指軟腍腍嘅嘢呀？」
Vivian﹕「唔知點解喎，係咪話人新年拎盆桔去收利是？」
Toby：「我係美國讀書唔識中文㗎，乜嘢係生瓜？」
Sue：「專俾人搵笨嘅蠢人囉……同水魚差唔多解釋？」
