黑人都可以做到美國總統，真係世界變！星俠咁講並無任何歧視成份，首先奧巴馬的確係黑人，而且星俠亦十分佩服創造歷史之人，當然包括剛當選美國總統的奧巴馬，用到「世界變」來形容，只係應對近年全球秩序真係同舊時代那一套唔同。
美國係引發今次全球金融海嘯的國家，但美股道指家陣竟然企在9600水平，與高位14198比較，跌幅不過三成左右。後市係點？星俠自問唔多識睇。港股昨日成功突破20日線，收報14840，但有夾硬扯上之感；如果港股後市有力再上，兼收復10月中介乎15962至15231的裂口位，後市才較有睇頭，否則估計今波反彈應差不多，散戶若低位未能捉到「鹿」，建議謀定而後動。
目標價3.3元
中國旺旺（151）股價昨抽升9.3%，突破50日線，收報3.04元，升勢似有餘未盡，若後市能守穩2.90元水平，伺機上試3.30元，入市短炒可以2.70元作止蝕參考。
內地「毒奶事件」似已受控，除非當局唔爭氣，未有執正食品安全，否則三聚氰胺事件應已告一段落，內地食品股經此一役，股價普遍回落，資金會趁機吸納長遠受惠內地市場的股份，估計旺旺應係目標之一。
方星俠