樓市疲弱，不過，喺二手公屋市場就唔係咁講，據中原地產嘅資料，上個月喺黃大仙竹園北邨，有個35樓嘅高層單位賣出，大家估吓喺咁嘅市道下，以幾錢成交呢？答案係155萬銀！
155萬買公屋！聽落都令人嘩然，尤其喺家陣金融海嘯市況低迷下。華華即時睇番呢兩日私人樓二手成交市場，見淘大花園高層單位，都只係152萬銀；天水圍嘉湖山莊家陣更係唔使百萬銀買到！
不過咁，黃大仙上下邨、鳳德邨同東頭邨等，因為位置好，唔少樓價企喺130萬樓上，前香港中小企聯合會會長佘繼標06年時就用當年貴過嘉湖山莊嘅樓價，買入黃大仙一個公屋單位。而竹園北邨絕對有得炒，好似今年7月未冧市時，同一公屋嘅31樓單位，亦曾經以150萬銀轉手，呢個單位，兩年前樓價只係120萬銀。