紐卡素中場祖爾巴頓(J巴頓),人躁底運氣卻好。唔提之前壞事做盡,都得到紐記重用;上場波佢腳踢楊格、指插艾邦拉荷鼻哥窿,成個暴行喺電視、報紙圖文並茂,結果英足總周二一句話「唔追究」,又逃過6場停賽嘅處罰!J巴頓知道後話:「我當時覺得佢侵犯我!賽後我哋揸過手,幾咁閒啫!啲人係要誇大件事!」我求大俠都反叛過,亦打過幾次交(戰績1和3負),J巴頓嘅言論根本唔覺得自己有錯,既然唔知有錯自然會繼續犯錯,大家拭目以待啦!