小時候好簡單，用支竹籤捲啲麥芽糖再夾餅，就可以啜足一日，支竹籤仲唔捨得掉。但依家想搵個檔口仔買？除非時光倒流30年。不過，又唔使灰心，自己喺超巿買樽麥芽糖，夾吓餅時，仲可以攞嚟煮雞！而且記得加少少鎮江醋入去，咁雞肉會更清甜之外，仲有陣麥芽香味，令人要一食再食！
記者：劉明慧
攝影：林栢鈞、伍慶泉
模特兒：Ryan@PureModels
今日煮腦 12:30pm
KitMak（食譜作者及專欄作家）
擔任飲食雜誌專欄、食譜作者及烹飪節目主持；為不同飲食機構擔任食物造型拍攝設計、食譜設計。
菜式：
雪耳豬肉羮
香辣麥芽雞煲
腐乳葱爆羊肉
冰花蓮子露
http://web.mac.com/mak.attack
網址： http://cooking.appledaily.com
香辣麥芽雞煲
製作難度：★☆☆☆☆
時間：20分鐘
麥芽糖甜度只是砂糖的三至四成，而且仲好處多多，與水溶解後會化作葡萄糖，又有維生素B，養顏、補脾益氣、潤肺止咳、緩急止痛、滋潤內臟、開胃除煩。加入雞煲中，令雞肉味道帶清甜，仲散發出陣陣麥香味。
材料
雞腿肉3塊、辣椒2隻、薑3片、蒜頭3粒、亁葱3粒
醬汁料：生抽2茶匙、水3湯匙、麥芽糖2湯匙、鎮江醋2湯匙
醃料：糖1茶匙、生抽1湯匙、雞粉/胡椒粉各少許
做法
1.雞腿肉切成方塊，下生抽、胡椒粉、糖及雞粉醃一陣備用。
2.麥芽糖用水開稀，然後混合鎮江醋及生抽備用。
3.以大火燒熱油，放長筷子於油中試油溫，見有少少泡就轉中火，下雞肉走油，待雞肉轉色，撈起瀝亁油備用。
4.大火燒熱鑊轉中火下少許油，先爆蒜頭及亁葱，再落薑片及辣椒。
5.待所有配料香味溢出，下雞塊及（2）兜勻，冚蓋熄火焗數分鐘後上碟。
貼士
想餸菜好味啲惹味啲，就要加鎮江醋，可以帶出麥芽糖的麥芽香味。
腐乳葱爆羊肉
製作難度：★☆☆☆☆
時間：20分鐘
腐乳、辣椒再加京葱，三樣濃郁的調味料，令羊肉羶味盡去之餘，仲非常惹味。
材料
羊肉片300克、京葱2棵、腐乳3磚、紅椒碎1隻、生粉水適量、麻油/鹽/糖各少許
醃料：生抽11/2湯匙、紹酒1湯匙、蒜茸3茶匙、糖/薑茸各1茶匙、胡椒粉少許
做法
1.羊肉片加醃料拌勻備用。京葱切碎備用。
2.大火燒熱油，下京葱炒香，撈起備用。
3.大火燒熱油轉中火，下紅椒碎及腐乳爆香，然後轉大火下羊肉同炒至八成熟時，加入京葱兜勻，下鹽、糖及麻油調味，最後以生粉水埋芡即可。
貼士
怕羊肉的羶味，可用四寶：蒜、薑、紹酒及胡椒粉，醃15至30分鐘，羊肉炒起來就會好味好多。
雪耳豬肉羮
製作難度：★☆☆☆☆
時間：20分鐘
豬肉碎及雪耳有咬口，再加上用馬蹄粉水埋芡，做成湯羮之餘又不會太稠！
材料
蛋白2隻、豬肉碎100克、芫荽2棵、上湯500毫升、水11/2杯、雪耳3朵、馬蹄粉水適量、鹽/糖/胡椒粉各適量
'
肉碎調味料：麻油適量、生抽1茶匙、糖1/2茶匙
做法
1.豬肉碎加入生抽、糖及麻油調味，拌勻備用。
2.芫荽切碎備用。雪耳浸至發大，切碎備用。
3.上湯及水放落煲後開大火煮沸，下肉碎及雪耳灼熟，逐少逐少加入馬蹄粉水埋芡至稀稠適中。
4.熄火，將蛋白拂勻後，慢慢下湯羮中做成蛋白絲，再下鹽、糖及胡椒粉調味，最後下芫荽碎拌勻即可。
貼士
雪耳有不同種類，用較大的來煮這餸，出來的效果黏性較重；而用小朵的會爽身好多，較適合。
冰花蓮子露
製作難度：★★☆☆☆
時間：1小時
秋凉時分，天氣亁燥，用蓮子、冰糖及雞蛋潤一潤，仲有粒粒西米，有咬口又滋潤。
材料
雞蛋2隻、蓮子160克、泰國西米300克、水6至7杯、冰糖50至75克、馬蹄粉水適量
做法
1.將蓮子略冲洗，加入5至6杯水，浸在水中2至3小時後，取出去芯備用。
2.將蓮子浸水放煲內，冚蓋煮20分鐘，熄火焗20分鐘，重複煮焗步驟2至3次至蓮子腍身。
3.煲滾水轉中火，將西米加入煮至半透明，熄火冚蓋焗片刻至全透明，撈起隔水備用。
4.冰糖加入（2）中煮溶，用隔篩加入馬蹄粉水埋芡，下拂勻的雞蛋做成蛋絲，最後加入西米即可。
貼士
煲蓮子點至夠腍？浸的時間要夠，煮時不可加糖。西米亦不可以浸水，因一浸就會爛，煮不到一粒粒，仲會好難食。
網上重溫
http://cooking.appledaily.com