啱啱過咗嘅萬聖節，港人排隊玩鬼屋排到抽筋，親眼見證港人有幾鍾意「做節」。打開報紙，有廣告大字標題問：「萬聖節之後聖誕節之前係乜節？」諗真又係，11月又真係好似無乜大節日喎，咪無藉口蒲？唔使驚，世界之大騎呢節日何其多，呢個11月，無女無錢嘅光棍大晒，Join埋一齊慶祝啦。
記者：王震遠
協力：許維雅
攝影：陳盛臣
模特兒：Algie@PureModels
中國11月11日大光棍做主角
去蒲啦喂！無錢無伴光棍一條都唔使憂，因為呢個世界仲有「11‧11光棍節」，吉祥物係代表「11‧11」嘅四條油炸鬼，中間一點係大包。話說中國南京某戶有四個光棍打麻雀，由11:00am打11:00pm，無論自摸定出銃，食糊一章牌一定係四索，後來有人發火：「鋪鋪都食四索嘅？」牌局完，佢哋一齊冲凉，肉帛相見，輸家大叫：「我知道點解食親糊都係四索咯。」因為嗰日係11月11日，拼埋就係四條一，為紀念呢件怪事，佢哋定11月11日為「光棍節」，後來可能班光棍唔夠節日用，再定1月1日為「小光棍節」，1月11日同11日1日為「中光棍節」，11月11日自然改為「大光棍節」，當日，單身漢老奉旨約埋一班光棍聯黨慶祝，有人更選擇「光棍節」結婚以示脫「光」。（ http://zh.wikipedia.org/w/index.php?title=%E5%85%89%E6%A3%8D%E7%AF%80）
泰國11月25日馬騮任食唔嬲
港人鍾意食Buffet，泰國馬騮原來都鍾意食Buffet。每年呢一日，泰國印度教會舉行「猴子自助餐節」，紀念猴神哈努曼救印度王子有功，泰國人準備超過2,000公斤水果、糖同汽水招呼馬騮。同猴唔猴命，香港馬騮山連餵隻蕉都唔准，我哋班齊天大聖就無咁好福氣咯。（ http://weirdlyenough.blogspot.com/2007/12/blog-post_01.html）
英國12月9日寄聖誕卡畀聖誕卡
數12月節日，唔使問阿貴都會諗起聖誕節，再數聖誕節有乜必設元素，數聖誕老人、聖誕樹、火雞，有排都未數到聖誕卡。不過唔係吹水，其實聖誕卡本身都係節日主角，倫敦有位爵士為慶祝1843年全球第一張聖誕卡面世，所以定呢日係「聖誕卡日」。無聖誕卡，今日我哋都唔可以寫卡媾女啦！既然咁偉大，一於寄番張聖誕卡，抬頭寫番畀「聖誕卡」啦！（ http://www.holidayinsights.com/moreholidays/October/nameyourcarday.htm）
美國1月21日擁抱你的家人
問心，你有幾耐無擁抱過屋企人？擁抱係愛嘅表現，透過擁抱表現愛意使乜怕醜？無藉口攬唔落手，不妨借助呢個「美國國家擁抱日」，咁就大條道理攬攬錫錫親朋戚友，順便手講句：「我愛你。」敵人？照攬，甚麼恩怨立即消。不過攬還攬，千祈咪左擁右抱手多多。（ http://www.nationalhuggingday.com）
日本2月10日摸裸男行好運
日本岡山縣同愛知縣都有「裸體節」，每年2月第三個星期舉行，千祈咪諗住食定花生上街睇靚女喎，否則你會非常失望，因為參加者全男班，成群麻甩男笠條着咗等於無着嘅日本襠布遊街，當中一人全裸，參加者只要搵到邊個人全裸，摸一摸佢就全年行好運。（ http://article.pchome.net/content-462484.html）
印度3月21日打男人頭殼
相傳印度英雄之神克里什那婚前常到女友家鄉惡作劇，玩弄她的女親友惹來不滿，以棍追打還擊，漸漸變成了今天的「打男人節」，專畀女人揸住碌棍見男人就扑，棍棍大力唔揸流攤，話就話有個盾牌仔擋一擋，但以一敵百都咪話唔甘。（ http://en.wikipedia.org/wiki/Lath_mar_Holi）
美國4月7日NoMore家務
港人日做夜做，返屋企邊個唔想做皇帝？不過鬼叫你窮呀，無錢請工人，仲有掃地洗衫大堆家務等住你做。美國好玩啲，有個「唔做家務日」，當日搞東搞西乜都得，就係唔准做家務，難得有日奉旨偷懶，香港應該響應啦。（ http://www.holidayinsights.com/other/nohouseworkday.htm）
美國5月2日唔着褲通街走
唔着褲出街？老外乜都夠膽死，每年5月第一個星期五係「唔着褲日」，攞正牌露Under。咪誤會，佢哋絕對唔係暴露狂，純粹為過癮，我都會支持，不過只限屋企範圍。（ http://www.nopantsday.com）
英國5月26日碌落山追芝士
老外鍾意食芝士，仲會用芝士比賽。英國「追芝士節」，將7磅重芝士球由山頂碌落山，參賽者由山頂開始追芝士，為求追到佢，同《黑社會》掟人落山一幕差唔多，總之就追到一仆一碌，跌到斷手斷腳在所不惜，實情佢哋只係跟住嚿芝士碌落山，至今無人追到嚿芝士。（ http://www.cheese-rolling.co.uk/）
美國6月6日人人愛冬甩
美國冬甩專門店KrispyKreme執笠，證明美國飲食文化唔係瓣瓣啱香港，相反美國人對冬甩嘅愛戴程度，一如港人之愛打邊爐，仲將6月第一個星期五定為「冬甩日」，不如香港都搞番個「打邊爐日」啦。（ http://en.wikipedia.org/wiki/National_Doughnut_Day）
中國7月14日-16日（陰曆）摸奶避鬼
雲南彝族有送鬼節日「摸奶節」，相傳亡魂會上人間搵老婆，姑娘唔想俾鬼拉落地獄，惟有挺起胸脯任人摸，咁就可以避鬼。男仔喺街遇到唔相識女仔，可以任摸唔嬲，估唔到雲南彝族仲開放過香港。（ http://b.baidu.com/view/1791266.html）
西班牙8月27日見人就掟番茄
細個拎食物玩，實俾阿媽鬧，西班牙細路就可以奉旨玩番茄！8月最後一個星期三有「番茄節」，當日番茄當武器，見人就掟，為時兩個鐘，人人染到一身紅，場面何其壯觀。浪費食物？放心，所有「武器」都係過期賣唔出嘅番茄。（ http://www.globalgourmet.com/destinations/spain/tomatina.html）
美國9月11日唔睇新聞
無新聞就係好新聞！外國有「NoNewsIsGoodNewsDay」，為遠離壞新聞，當日唔會睇電視同報紙。
（ http://www.gone-ta-pott.com/no_news_is_good_news.html）
美國10月2日汽車有朵
男人視座駕為二奶，會唔會幫二奶改番個名呢？外國有「為汽車改名日」，老外相信每架車都有個性，好應該為愛妾起番個朵。唔知喺朋友面前暱稱架車，會唔會笑大人個口呢？（ http://www.holidayinsights.com/moreholidays/October/nameyourcarday.htm）
