聞道陳任逝世，不勝傷感，近十幾年來，久不久就與陳任在飯局見面，不過左丁山唔飲酒，唔吸煙，所以唔算佢嘅圈內老友，如吳錫輝、曾智華、黃子程等，就係佢嘅老死。幾年前在一個場合，聽過佢唱幾句樂與怒，昔日雄風猶在。好羨慕識彈結他（或任何樂器）、識唱歌之人，佢哋興之所至，飲杯酒，彈結他，唱一輪歌，然後咬雪茄，傾懷大笑，人生何等輕鬆，遠勝左丁山只係得把口與一支禿筆，悶蛋一名。陳任恩師C教授話醉酒當歌，人生幾何，正是陳任最佳寫照。人生活得豐盛快樂，壽命有一甲子加三年，亦無憾矣！
陳任在六十年代中曾參與組band潮流（TheMenace），出過唱片，與當年之許冠傑（TheLotus），鄭東漢（鄭中基父親，TeddyRobin&ThePlayboys），JoeJr，MichaelRemedios，羅文（Roman&theFourSteps），各爭雄長，係本港流行樂壇之黃金時代，溫拿樂隊已是後幾年。但本地樂隊之走紅，只有三四年，以後除咗許冠傑與羅文成功轉型，成為歌神歌聖之後，其餘樂隊各散東西，去咗搞唱片公司或是拍電影，陳任就做DJ直至病逝。一位校友L與JoeJr相熟，兩年前知道JoeJr開演唱會，搵埋成班人去捧場，順便懷念佢年青時追逐樂隊之少年時光。左丁山因時間不合，冇去到，腦海中仍有若干年青Joe與IreneRyder之青春倩影，不忍破壞之。
何故六十年代中卜公碼頭盛會過後，香港突然冇晒人夾band，直至太極、草蜢、Beyond等粵語歌曲樂隊出現為止？左丁山冇研究流行文化，無從解釋，其實六十年代時，香港人幾窮吓，組織樂隊要一大筆錢，甚不容易，左丁山只能大膽推測當年夾band之人，屋企大都有個錢，而且當時貓王、披頭四、白潘、力奇尼路臣、保羅安卡等紅遍世界，香港年青人受到感染，讀番書之餘，就唱歐西流行曲，開party，到有咗無綫電視，帶頭播放粵語流行曲，自此歐西音樂衰落至今。