假如話你知，夢境反映到你日常生活有幾大壓力，仲有解決方法，可能你會話吹水唔抹嘴。唔好柴台住，導師周柬妮話解夢其實可以好科學，亦係心理分析嘅一種，發夢仲可以抗抑鬱㖭。港人，今晚早啲上床，發番個好夢啦。
記者：周靜雯
攝影：林栢鈞
鳴謝：聖雅各福群會解夢證書課程導師周柬妮
同潛意識溝通
解夢前，先要知道夢係乜嘢，其實夢係潛意識同自己溝通嘅方法，聖雅各福群會解夢證書課程導師周柬妮指：「潛意識表達嘅係影像，潛意識播緊套戲畀番自己睇。」基本上人人都會發夢，唔記得只係印象唔夠深刻，所以會記得嘅通常都係噩夢，壓力大嘅人，發噩夢機會比其他人高，即係話壓力同噩夢係Twins，打孖搵上門，你壓力越大，發嘅夢就越噩。
發夢抗抑鬱
發夢可唔可以減壓？「可以，而且有文獻記錄。」周柬妮答得好肯定。事緣美國著名作家威廉．斯蒂倫（WilliamStyron），當年就係憑一個夢令佢有靈感寫成《蘇菲的抉擇》一書，「之後佢患上抑鬱，發嘅夢越來越少，大概一年後，佢發夢見到自己喺遊樂場盡情玩，瞓醒後解開心結，抑鬱慢慢康服，有分析指威廉喺夢中，將鬱結、壓力通過玩而釋放。」嘩，聽到啦，甚麼金融海嘯、三聚氰胺，上到床就盡量唔好諗，統統拋諸腦後，撻落床發番個好夢好過。
日有所思≠夜有所夢
日有所思，夜有所夢，有無根據？「我絕對唔贊同，」周柬妮話：「你一日見過咁多嘢，唔通樣樣嘢都發夢咩？」咁又係，唔通你發夢碌落樓梯，就代表你嗰日碌過落樓梯咩。「要解夢，唔可以太表面，一定要睇番夢嘅象徵意義。」有壓力嘅人，發夢都有共通點，你有無發過類似今次提及嘅十個夢？如果有就要留意吓，因為你潛意識已經提醒緊你──你壓力大到爆啦。好嘞，當你知道個夢提醒緊你有乜問題，自會積極搵解決方法，壓力小咗，人自然開心番啦。
俾鬼追=做鴕鳥視而不見
我諗除咗《怪談》攝製隊外，相信無人想見鬼。疑心生暗鬼，老實即係自己嚇自己，夢到俾鬼追，暗示有自身問題唔肯面對，鬼嘅象徵意義就係你一心逃避唔肯解決嘅問題。清楚未？清楚就唔好做鴕鳥，今天的事今天做，問題擺得耐唔解決，就會變難題㗎嘞。
壓力指數：★★★★★
點算好：唔好逃避，唔好鑽牛角尖，搵朋友家人商量。
高處墮下=無自信心
高處墮下即係墮落？吓？咁易解？周柬妮表示：「係，因為夢會反映潛意識，通過象徵意義解釋到夢。」發夢從高處跌落無底深潭，咪覺得自己墮落到無得救？「都係㗎，所以都幾慘，要盡快搵出問題所在，立即解決。」其實乜問題都好，做人應該有自信心，呢個世界，無嘢係解決唔到嘅。
壓力指數：★★★★★
點算好：修讀課程建立自信、學習逆境自強，相信自己能扭轉亁坤。
俾怪獸捉=煩惱困擾
同俾鬼追相似，分別在於怪獸係人類知識以外未必真正存在嘅物體，所以象徵外來煩惱。怪獸捉你，暗示有外來問題煩擾緊你，你知問題存在，但又視而不見。都係嗰句啦，逃避唔係辦法，越唔理問題，夢入面嘅怪獸會越惡去提醒你。
壓力指數：★★★★☆
點算好：搵個清靜地方清醒頭腦，理清頭緒，盡快搵出問題所在。
磨牙=身體緊張
瞓覺發夢緊張到磨牙，代表你壓力好大，因為連休息呢啲應該放鬆嘅時間，都緊張到咬牙切齒，暗示身體已經唔能夠正常放鬆。聽到呢度有啲驚，因為我間中都會瞓覺磨牙，磨牙嗰幾日，一定有好多工作在身，真係睇相都無咁準。
壓力指數：★★★★☆
點算好：作息有序，放鬆身體，冲個熱水凉先瞓。
甩牙=說話得罪人
好多人都試過發夢甩牙，代表乜？首先，牙齒生喺口腔，而口係人最主要溝通渠道，甩牙，講句嘢都漏風啦，所以甩牙象徵溝通有問題，例如經常講錯嘢得罪人、口齒唔夠伶俐等。問心，對人對事，你有無成日開口就夾着脷先？
壓力指數：★★★☆☆
點算好：學賣口乖，買訓練口才書籍自我增值。
碌樓梯=身心俱疲
因乜碌落樓梯，腳軟？差錯腳？點都好，呢個夢暗示你身體狀況差，連行樓梯嘅力都無，即係你太攰，身體開始支持唔住要冧囉。Model聽到我咁講，都話自己成日發夢碌樓梯，工作忙經常失眠唔夠瞓，身體都好攰，但休息番幾日，就再無發呢隻夢喇。
壓力指數：★★★☆☆
點算好：唔好開夜車，休息大覺瞓。
陌生人病=自己有病
病有好多種，唔同病有唔同象徵意義，見到陌生人病，陌生人就代表你自己，佢有乜病就代表自己要面對乜問題。我試過夢見陌生人，佢所有關節都唔能夠活動，要靠親人照顧，周柬妮解釋：「發夢關節有問題，代表你覺得自己處事唔夠靈活，希望可以從家人朋友身上得到改善。」哦！原來係咁。
壓力指數：★★★☆☆
點算好：說話經大腦，學習待人處事，多啲應酬。
親人有病=多關心
夢到親人有病，瞓醒會第一時問問親人有無問題，就係呢吓關心，已經令問題解決一半。點解？因為親人有病，其實係潛意識想話你知同呢位親人之間嘅關係出現問題，當你願意打破隔閡，提出關心，有傾有講，乜問題都有機會解決啦！
壓力指數：★★☆☆☆
點算好：有傾有講多溝通，好事壞事齊分享。
身處災難現場=逼到埋身
夢到災難，見到死人冧樓，都咪話個夢唔噩，真係嚇醒幾次都仲得。點解咁恐怖？因為呢個係潛意識畀你嘅最後通牒，提示你再唔做某啲事，你將會死人冧樓都唔掂！如果真係發埋啲咁嘅夢，要諗吓有乜事水浸眼眉嘞，拿拿臨KO咗佢咪無壓力囉，遲早都要做㗎啦。
壓力指數：★★☆☆☆
點算好：少說話多做事。
突然發達=莫財
發夢銀行戶口多咗錢，甚至大家最想夢到嘅中六合彩等，好多人都會即刻記低啲號碼，諗住發番個橫財。不過，Sorry！通常發親呢啲夢，都反映你當時經濟出現問題，所以先喺夢入面滿足自己，同現實剛剛相反。唉，諗咁多做乜，俾心機返工，買少啲無謂嘢，啲錢就好快返嚟啦。
壓力指數：★☆☆☆☆
點算好：使少個錢，積穀防饑。
