我求大俠近來好鍾意睇巴塞隆拿，佢哋嘅進攻足球相當悅目，近呢個幾月仲贏到開巷；係38年嚟新教練最佳嘅開季成績，點到你唔服！一班球員表現出色唔在講，美斯、沙維同伊度奧上晒力，幾乎場場有波入；但係亦不得不讚佢哋嘅「將軍」哥廸奧拿教導有方，令到魯營球場更衣室氣氛融洽，班𡃁上到球場零舍醒目！
上季列卡特帶領巴塞四大皆空，隊中大牌球星搞內訌、又玩失蹤，亂過亂世佳人！哥廸奧拿要收拾呢個爛攤子，都咪話唔頭痛；正所謂家和萬事興，少帥一於訂立多條條約，作為復興強大巴塞嘅第一步。
練習遲到即罰6萬
罰得最重嘅係練習遲到，罰成6,000歐元！差唔多成6萬蚊港紙！咁講法，遲到幾次，都夠我求大俠交首期供一個上車盤單位囉！另外，哥帥亦唔畀球員夜歸，實行要佢哋做灰姑娘，午夜打電話去屋企冇人聽嘅話，即磅2,000歐元！
咁仲唔止，少帥為大家多啲聯絡感情，要齊齊開飯，邊個遲到就罰500歐元，而喺巴塞平日當值時間，更嚴禁使用手機同MP3。聽落呢啲規矩好似好專制，但所有球員都必須嚴格遵守，話之你係當紅球星，犯規即時磅水！話就話幾千歐元對一啲攞緊天價周薪嘅球員好濕碎，但係人都知家陣經濟差，慳得一蚊得一蚊呀！
巴塞實行「修身、齊家、治國、平天下」以嚟，效果理想，更衣室冇咗上季嘅戾氣，大家同心協力越踢越有，哥廸奧拿嘅厲政確係有料到！前晚巴塞主場和巴素利1:1，留力之餘仍晉級16強，但最大代價係中場恩尼斯達傷咗右腳，要唞6周，下個月「國家打吡」對皇馬隨時冇得出！唔知少帥有乜計仔呢？
巴塞約法四章
1〉練習遲到罰6,000歐元
2〉半夜唔聽電話罰2,000歐元
3〉食飯遲到罰500歐元
4〉當值期間禁用手機及mp3機