講開家品設計師，大家即諗起PhilippeStarck等猛人，但要數土炮的，就唔多諗得到。日前26歲本港設計師李穎琳（Keikko）一盞StickerLamp奪得年輕設計尖子聚首一堂的「SeoulDesignOlympiad2008」Fire組別的金獎，憑「Whynotmakea2-Dimensionalflattenedlamp?」，一鳴驚人。
記者：林佩婷
攝影：林栢鈞
部份相片由被訪者提供
無心插柳
Keikko可謂香港土生土長的新一代產品設計師，這次比賽的作品，最初是因為朋友搬屋而諗到。「朋友好鍾意水晶燈，但又無錢買大屋。嗰陣我就諗其實所有物品都唔應該有特定形態，於是諗到貼紙水晶燈，貼邊都得。跟住搵耐用物料同要耗電量少嘅，大約諗咗一兩個月就有呢個構思，只要喺背面貼上太陽能板，表面為冷光物料，夜晚就會發光。咁啱又知道呢個比賽，於是寄去參加，得獎嗰刻都好震驚。」
是次得獎作平面貼紙燈。（意念創作）
最近復興扭計骰，Keikko設計可同時為小朋友梳化及玩具的轉動「方骰」。（意念創作）
市面給晚上玩的玩具不多，故設計這支槍，可隨意更換裏面的萬花筒片。（意念創作）
《Tidyinasecond》只要將雜物推向會凹下的層板，食完飯再推番出嚟，就唔使成日執枱！（意念創作）
前兩年新加坡的室外雕塑擺設比賽作《Moment》，乃依人行快慢去控制音樂的大型裝置。（意念創作）
理想VS現實
Keikko現職玩具設計師，但最初志願是平面設計。「中一寫我的志願時已經係設計師，但到讀IVE先知原來設計分好多種，產品設計又包含埋平面及其他，所以後嚟轉咗方向。玩具設計師係我第一份工，原意想做啲畀18、19歲年輕人玩嘅玩具，但公司主力做小朋友玩具。不過我算好彩，10件設計都有1件成功面世，老闆話佢哋以前分分鐘100件先得1件！」只可惜她的公司是賣設計意念給外國玩具公司，故香港未有她的設計售賣。
天馬行空品牌夢
Keikko不但設計玩具，還有家品、擺設等，熱愛參加各式的設計比賽。「我其實最愛係家品設計，但香港想搵呢類工實在好難！惟有平時行街諗到Idea就儲起，遇有比賽就拎啱嘅作品去參加，由讀書開始已參加過十幾個比賽。」觀乎她平常的設計如一人的士、懶執餐枱、隨身攜帶熨斗等，都是從生活細節構思出來，亦不約而同展現未來，「設計當然要令未來更進步才叫有用」便窺其設計理念。目標是希望日後有自己的品牌或生產線。「外國嘅產品會落設計師個名，但香港唔會，希望有日可做到。日後可以嘅話做番家品設計就好喇。」
