大市唔肯回，噚日早段本來就調整緊，恒指曾經跌成500點，但午後受日股大升帶動，恒指一度反升200點，收市14384，升39點，期指又轉為高水，短期市況相信仍會橫行，在13500至14500間上落，消化完再上。
內銀股同內房股個勢都好強，六行中以中信銀行（998）最勁，收2.72元，大升0.34元，升幅13.8%，其次係招商銀行（3968）同建行（939），分別升7%同4.7%。內房股兩大龍頭中國海外（688）同華潤置地（1109）同有近4%進賬；富力（2777）有大行增持，最高搶到4.39元，回收4.08元，升0.33元，升幅8.8%。
新華文軒（811）跟市反彈，升勢越來越有力，高收1.41元，升8仙，升幅6%，股價已重上10日線（1.22元）同20日線（1.34元）之上，現時MACD已出現熊牛入貨訊號，待10日線升越20日線，即可確認中期跌市完成，升浪再起。
每股持現金2.3元
新華由去年7月底高價8.70元掉頭回落，跌足年幾，最低位0.98元，大跌88%，跌到過晒龍，現時反彈，第一站可以今年3月中低位2元為目標，第二站係5月初高位3.80元。
公司係本港首家上市的圖書零售分銷商，基地在四川，業績穩定係優點之一，而資產豐厚更加吸引，所以，新華股價回升上2元及3.80元呢兩個目標，只係好保守估計，若市道轉旺時，重見上市價的5.80元，亦唔係冇可能。
07年（12月年結），新華獲利3.88億元人民幣（下同），每股盈利40分，派息30分；08年上半年，獲利1.58億元，每股盈利14分，已扣除四川地震的捐款2000萬元。
08年全年，估計盈利3.4億元，每股盈利30分，約34港仙，第一站2元嘅PE只係5.9倍，估計派息10港仙。到09年，盈利可恢復增長。
08年6月底，新華NAV35.43億元，每股NAV3.52元，其中現金同銀行存款就有23.27億元，約26.3億港元，無負債，每股實持有淨現金2.30元，現時股價實在係大平賣，中線持有，獲利會好可觀。
郭兆誠