樓市唔好，連搞樓盤選舉都唔係咁易。香港測量師學會搞咗幾年十大樓盤頒獎典禮已經唔容易，有籌委委員慨嘆，今年遇上金融海嘯，更少新盤賣，睇怕出年又唔使搞，長此落去唔係辦法，可能要連澳門、深圳嘅盤都擸埋。
舊年已因為政府嘅勾地政策，少咗好多地賣，搞到學會好頭痕，因為報名嘅盤源嚴重短缺，搞到學會舊年要被迫停辦一次。
講番噚日個頒獎禮，今次單一樓盤攞獎最多係信置（083）同市建局合作發展嘅荃灣萬景峯，有5個獎。
恒地（012）大埔比華利山別墅同新地（016）荔枝角曼克頓山都各攞4個獎。
長實樓唔實際
以四大發展商計，攞獎最少係長實（001），兩個盤加埋都只係得到3個獎，仲係啲重包裝如樓書、市場推廣同會所設施嘅大獎，最反映樓盤實用同住得舒適嘅樓則獎就冇佢哋份。