蘋果高層執位，iPod幕後功臣TonyFadell，以個人理由辭任高級副總裁，不過蘋果希望佢改為擔任公司顧問，佢個位由IBM前高層MarkPapermaster頂上。不過，據《華爾街日報》報道，IBM似乎唔想放人，入稟阻止Papermaster跳槽。
Fadell為iPod嘅成功立下汗馬功勞，佢有「iPod之父」嘅稱號。當年就係佢嘅創意，諗出iPod呢個概念，然後向各大公司推銷，但就得蘋果獨具慧眼，幫佢成立30人開發隊伍，最後由行政總裁喬布斯設計外形，先至有今日嘅iPod。除咗設計iPod，Fadell亦有參與iPhone嘅開發㖭。
至於接手嘅Papermaster，據講會喺呢個月稍後時間上任，佢喺IBM專長晶片設計，咁好嘅人才，IBM當然唔想佢走，報道爆IBM入稟阻過檔，指佢違反「互不競爭協議」，要跳槽到競爭對手就要離職後一年先得。咁IBM會唔會有進一步行動？由於佢哋未有回應，所以暫時仲未知。