外傭稅係咪要撤銷呢條戰線越嚟越緊張，勞福局局長張建宗俾葉劉搞到頭都大晒。佢早排請落嘅政治助理莫宜端，產後休息完，噚日正式返工，當務之急係幫局長拆彈。呢場「考試」嚟得又兇又急，第一仗過唔過到關，唔使一個月就知曉。
天未光餵奶建母子情
話說莫宜端早排大住個肚獲聘做勞福局政治助理，張建宗擺到明向外界宣示佢冇懷孕歧視。之後莫宜端生咗個可愛仔仔，𠵱家已經三個幾月大，身為全職媽咪，佢新請咗個外傭幫手湊仔。做媽咪嘅天職冇人能代替，呢位新手媽媽噚日同八方講，返工之後都好掛住BB，惟有每日天未光就起身餵奶，爭取時間培養母子情。
莫宜端身為外傭僱主，睇怕都好明白一班外傭僱主嘅心態。佢話對於處理外傭稅呢個問題，唔多唔少都有幫助。𠵱家佢急忙要溫書，摸清政治形勢，然後開波同立法會議員做游說工作。
張建宗呢排頭頭碰着黑，煲呔急撤生果金資產審查，佢要忙住解畫；又要幫煲呔拆外傭稅呢個炸彈。所謂「一喜擋三災」，唔知啱啱生完嘅莫宜端可唔可以旺一旺，同老細安然度過呢次危機？